اول تیموتائوس 3 - گیله ماز

کلیسایِ ناظران و شَماسان

¹ این گَبِ شَئنِه اعتماد هَکُردَن: که اَگِه یِنفر آرِزو این هیسِه که کلیسای نِظارتِ کارِ بِدارِه، خُجیرِ کارِ دُمّال دَرِه.

² پس، ایتا ناظر بایِسّی هر چیه جی که اونه سَرکوفتِ باعِث بونه دور هَبو، ایتا زِنایِ وَفادارِ شو هَبو، هوشیار هَبو، خودشه جُلوهِ بِدارِه، با آبرو هَبو، مِهمان دوس هَبو و بَتَّنِه تعلیم هَدِه؛

³ نه عرق خور، نه زورگو، بلکه آرام هَبو؛ نه جنگی، نه پولدوس.

⁴ اون بایِسّی خودشه خانِواده رِه خُوب بَچِرخانِه، خودشه وَچِه هان رِه جوری بار بیارِه که تمام احترامِ هَمرَه، اونه جی اطاعت هَکُنَن.

⁵ چون اَگِه کَسی نِدانه که چِطور بایِسّی خودشه خانوادهِ رِه بَچرخانِه، چِطور تانِه خُدای کلیسای جی مُراقِب هَکونه؟

⁶ وَ تازِه ایمان نیارده بو، نَکُنِه مغرور هَبو و اِبلیسِ مِثان محکوم هَبو.

⁷ بِعلاوِه، اون بایِسّی کِلیسایِ مَردُمِ دِرگای وَرجه هم خوش نام هَبو تا رُسوا نَبو و اِبلیسِ تَلِه دِلِه دَنِکه.

⁸ هَمینجور کلیسای شَماسّان بایِسّی باوقار هَبون؛ دُورو نبون، شرابِ گرفتار نبون، نادُرسِّ سودِ حِرصِ نَزِنِن.

⁹ اوشان بایِسّی ایمان رازِ، ایتا پاکِ وِجدانِ هَمرَه بِدارِن.

¹⁰ وَ اوشان بایِسّی اَوَّل آزمون هَبون، ایما اَگِه ثابت هَکُردَن که بی عیبِن، بَنین شَماسّی یه کارِ دِلِه خِدمَت هَکُنَن.

¹¹ همینجور، اوشانه زِناکان هم بایسّی وَرازنده هَبون، تُهمت نَزِنِن، بلکه هوشیار هَبون و همه چی یه دِلهِ وفادار هَبون.

¹² شَماسّانِ جی هر کدام بایسّی ایتاَ زِنا بِدارِه و خودشه وچه شان و خانوادِه رِه خوُب بَچرخانِه.

¹³ چون شَماسّانِی که خُجیر خِدمَت هَکُردهِ بون، ایتا خُجیرِ مقام گیرِنَن و اون ایمان دِلهِ که مسیحْ عیسی یِه دِلِئه، گَتِه اطمینان بِدس هارنَن.

¹⁴ اُمید دارَم که خیلی زود تی ورجه بییَم، ولی ایشانهِ تِرِه نِویسِنِم تا،

¹⁵ اَگِه می بَموئَن عقب دَکِته، بِدانی که خُدایِ سِرِه یه دِلِه که زندهِ خُدای کلیسا و حقیقتِ ستون و پِی هیسه، چِطور بایِسّی رفتار هَکُردن.

¹⁶ راس راسی که دینداری یه راز خیلی گَتِئِه: اونیکه جسم دِلِه ظاهر هَبا، خُدایِ روحِ طریقِ جی تأیید هَبا، فرشتگان اونه بَدییَن، قومِشانِ میَن اعلام هَبا، دُنیایِ دِلِه اونه ایمان بیاردِن، جلالِ هَمرَه، جآر، بَبِردِه هَبا.