اول تیموتائوس 2 - گیله ماز

همه یه وَسین دُعا هَکُنید

¹ پس، پیش اَز هر چی، خَنَم که خواسِّها، دُعاها، شفاعتها و شُکر هَکُردنها تمام مَردُم وَسین بِجا بیاردِه هَبو،

² پادشاهان و صاب منصبان وَسین، تا بَتَّنیم آرام و راحتِ زندگی بِداریم، که هر لحاظِ جی دیندار و وقارِ هَمرَه هَبو.

³ چونکه این اَمیی نِجات دَهنده خُدایِ نَظر خُجیر و اونه بابِ دِلِ

⁴ که خَنِهِ تمام مَردُم نِجات هَگیرَن و حَقیقتِ بِشناسِن.

⁵ چونکه فقط ایتا خُدا دَرِه، و خُدا و آدَمان مین فقط ایتا واسِطه دَرِه، یَعنی اون انسان که مسیحْ عیسائه؛

⁶ اونیکه خودشه جانِ هَدَئنِ هَمرَه، تمام آدَمانِ آزادی رِه بَهیَّه. این حقیقَتِ خُجیرِ وَختِ دِلِه شهادت هَدَه هَبا،

⁷ چون مَن اینِه خاطِری تعیین هَبام تا غیرِ یَهودیِانِ وَسین ایتا تعلیم دَهندِه و ایتا رسول و ایتا مُعلِم ایمان حقیقتِ دِلهِ هَبوم - حَقیقَتِ دَرَم گونَم و دُرو نَزَنَم.

⁸ پَس می آرِزو این که مَرداکان هَمِه جا بی غِیظ و دعوا مُرافِه خودِشانِ دَسِّ دُعا هَکوردَنِ وَسین جآر بَبِرَن.

⁹ هینجورم خَنَم که زِناکان آبرومَندانِه لِواس خودِشانِه تَن دَکُنِن، و نِجابت و حَیایِه هَمرَه، نه گیس هَکُردِه مو یه هَمرَه، یا طَلا و مروارید و یا گِران قیمتِ لِواسِشانِ هَمرَه،

¹⁰ بلکه خُجیرِ کارانِ هَمرَه، هَمونجور که اون زِناکانِ لایقِ که دینداری یه اِدعا رِه دارَن.

¹¹ زَن بایسّی آرامِش و کاملِ اطاعتِ هَمرَه تعلیم هَگیره.

¹² مَن نُزارنَم که ایتا زِنا تعلیم هَدِه یا ایتا مَردای سَرمُسلَط هَبو؛ بلکه بایسّی آرام هَبو.

¹³ چون آدَم، اَوَّل خلق هَبا و ایما حوا.

¹⁴ وَ آدَم گول نُخاردِه، بلکه زَن با که گول بُخاردِه و نافرمان هَبا.

¹⁵ وَلی زَن وَچِه بِزاسَّنِ هَمرَه نِجات گیرنِه، اَگِه ایمان و مُحبت و مُقدّس هَبوسَّن دِلهِ، نِجابتِ هَمرَه بُمانه.