اوّل تِسالونیکیان 5 - گیله ماز

خداوندِ روز

¹ اَسِه اِی اَداشان، وَختا و زمانایِ بارِه، نیازی نیِه یِچی شِمِرِه بنویسَم.

² چون خودِ شُما خوُب دانید که خُداوند عیسی یِه وَگَرِسَّنِ روز، ایتا دُزد مِثان که شُو دِلهِ هَنه، سَر رَسِنِه.

³ همون موقِه که مَردُم گونَن: «صُلح و سلامتی و اَمن و اَمانِه»، ایما یِدَفه هَلاکَت اوشانه سَر هَنه، هَمونجور که بَزاسَّنِ درد ایتا حامِلِه زِنا رِه گیرنه، وَ اوشان نَتَّنِن دَر بوشون.

⁴ وَلی اِی اَداشان، شُما ظُلَمات دِلِه دَنییَین تا اون روز، ایتا دُزدِ مِثانِ شِمِره غافلگیر هَکونه.

⁵ چون تمام شُما نُورِ وَچِه هان و روزِ وَچِهانید؛ اَما شُو و ظُلَمات جی نییَیم.

⁶ پَس بَقیِه یه مِثان اَمِرِه به خواب نَزِنیم، بلکه بیدار و هوشیار هَبیم.

⁷ چون اوشانیکه خاسِنَن، شُو خاسِنَن، وَ اوشانیکه مَس کانَن، شُو مَس کانَن.

⁸ وَلی اوجه یه جی که اَما روز جی هیسَیم، بایسّی هوشیار هَبیم، وَ ایمان و مُحبتِ زِرِه رِه اَمی تَن دَکُنیم، وَ نِجاتِ اُمیدِ ایتا کُلاهخودِ مِثان اَمی سَر بَنیم.

⁹ چون خُدا اَمَرِه غضبِ وَسین تعیین نَکُردِه، بلکه اَمی خُداوند عیسی مسیحِ طریق، نِجاتِ بِدَس بیاردنِ وَسین تعیین هَکُردِه

¹⁰ اونیکه اَمِی وَسین بَمِردِه، تا چه بیدار هَبیم و چه خواب، اونه هَمرَه زندگی هَکُنیم.

¹¹ پَس هَمدیگَرِ تَشویق هَکُنید، و ایمان دِلِه تقویت هَکُنید، هَمونجور که اَلآن هم کانید.

آخرین سِفارشا و دُعای خیر

¹² اَسِه اِی اَداشان، شِیمی جی خَنیم اوشانیکه شیمی میَن زَحمَت کَشِنَن و خُداوَندِ طَرَفِ جی رَهبَر هیسَن و شِمِره نَصیحت کانَن رِه، احترام بَنین،

¹³ وَ مُحبتِ دِلِه اون کارِ خاطری که کانَن اوشانه خیلی احترام بَنین. وَ هَمدِیگَرِ هَمرَه صلح و سلامتی یه دِلِه زندگی هَکُنید.

¹⁴ اِی اَداشان، شیمی جی خواهش کانیم که تنبلِ آدمان نصیحت هَکُنید؛ ترسو آدمان تَشویق هَکُنید؛ ضَعیفِ آدَمان کُمک هَکُنید؛ وَ همه یه هَمرَه صبور هَبین.

¹⁵ شیمی حَواس دَبو که کَسی یه بَدی رِه، بَدی یه هَمرَه جَواب نَدین، بلکه هَمَش اینهِ دُمّال دَبین که همدیگَر و مَردُمِ خُوبی هَکُنید.

¹⁶ هَمَش خوشحال هَبین؛

¹⁷ یکسَرِه دُعا هَکُنید؛

¹⁸ هر وضعیت دِلِه شُکر هَکُنید، چون خُدایِ خواسِّه مسیحْ عیسی یِه دِلِه شیمی وَسین اینه.

¹⁹ خُدایِ روحِ تَشِ نَکوشانین؛

²⁰ نَبوَّتها رِه کوچِک نِشمارین.

²¹ بلکه هَمِه چیرِه آزمون هَکُنید؛ و اونچه که خُجیرِ رِه، قایم بَچِسبین.

²² هر جور بَدی یه جی دوری هَکُنید.

²³ اَسِه خُدای صُلح و سلامتی خودِش شِمِره کامِلاً تقدیس هَکونه، و شیمی روح و جان و تَن رِه، تا اَمی خُداوند عیسیِ مَسیح بموئَنِ موقِه بی‌عیب بُمانه.

²⁴ اونیکه شِمِره دُخواندِنه، وفادارِ، و اون حتماً این کارِ کانه.

²⁵ اِی اَداشان، اَمَرِه دُعا هَکُنید.

²⁶ تمام اَداشان ایتا مُقَدَّس خُوشِ هَمرَه سلام بَرِسانین.

²⁷ خُداوَندِ وَر، شِمِره قَسَم دَنَم که این نامِه رِه تمام اَداشانِ وَسین بُخوانید.

²⁸ اَمی خُداوند عیسی مَسیح فیض شیمی هَمرَه دَبو. آمین.