اوّل تِسالونیکیان 4 - گیله ماز

زندگی ایی که خُدا رِه راضی کانه

¹ سَرآخر پس، اِی اَداشان، شما اَمی جی یاد بِیتین که چطور زندگی هَکونید تا خُدا رِه خوشحال هَکونید هَمینجورم که انجام دَنید. اَسِه خُداوند عیسی یِه دِلهِ شیمی جی خَنیم و اِلتماس کانیم هرچه بیشتر اینه باره تَقلّا هکونید.

² چون شُما دانید که چه حُکمهایی خُداوند عیسی یِه طریق، شِمِره هَدَیم.

³ خدای اراده اینه که مُقدَس هَبین: شِمِرِه بی‌عفتی یه جی دور بِدارین.

⁴ تا هر‌ کدام شیمی جی بِدانه که چِطور خودِشِه تَنِ پاکی و احترامِ دِلهِ بِدارِه.

⁵ نه شهوت و هوا و هوسِ دِلهِ، ایتا اون غیرِ غیهودیانِ مِثانِ که خُدا رِه نِشناسِنَن،

⁶ هیچکَس نباید این جریانِ دِلهِ خودشه اَداشِ حَق، خطا یا سو استفادِه هَکونِه، چون خُداوند تمام این چیزان رِه تقاص دَنِه، هَمونجور که اَما پیشتَر شِمِره باگوتیم و جِدی هُشدار هَدَیم.

⁷ چون خُدا اَمَرِه نه ناپاکی یه وَسین، بلکه مُقدّس هَبوسَّن وَسین دُخوانِسِّه.

⁸ پَس، هر کی اینه رَد هَکونه، آدَمی رِه رَد نُکانه، بلکه خُداییِ رِه رَد هَکُردِه که خودشه مقدّسِ روحِ شِمِره دَنهِ.

⁹ اَسِه اَداشانِه مُحبتِ بارِه نیاز نییِه یِچّی شِمِرِه بَنویسیم، چون خودِ شُما خُدایِ جی یاد بِیتین که هَمدیگَرِ محبت هَکونید،

¹⁰ چون شُما راس راسی تمام اَداشانِ مَقدونیه یه مَنطقه یه سَرتاسَرِ دِلهِ محبت کانید. ولی اِی اَداشان شِیمی جی اِلتماس کانیم که این کارِ بیشتر و بیشتر هَکُنید.

¹¹ و آرزو هَکُنید که آرامِ زندگی بِدارین و شِیمی سَر شِیمی کارِ دِلهِ دَبو، و هَمونجور که شِمِره دستور هَدَیم شیمی دَس هَمرَه کار هَکُنید.

¹² تا اوشانه پِیش که کلیسای دِرگا دَرِن دُرسّی یه هَمرَه زندگی هَکُنید و هیچکسِ مُحتاج نَبین.

خُداوند عیسی یِه وَگرسَّن

¹³ ولی اِی اَداشان، اَما نَخَنیم اون ایمانداران بارِه که بَمردن بی‌خَبَر هَبین، نَکُنِه که ایتا بَقیِه مَردُمِ مِثان که اُمیدی نِدارَن، ماتَم هَگیرین.

¹⁴ چون اوجه یه جی که اَما ایمان داریم که عیسی بَمِردِه و زندهِ هَبا، پَس همینجور، خُدا اوشانیکه عیسی یِه دِلهِ بَمِردِن رِه، اونه هَمرَه هارنِه.

¹⁵ چون اَما خُداوندِ کلامِ طریق اینه شِمِره اعلام کانیم که: اوشانیکه اَمی جی هَلَه زنده هیسَن و تا وقتیکه خداوند بییِه بِجا ماندِنَن، اوشانه جی که بَمِردَن پِیش دَنِکِنَن.

¹⁶ چون خودِ خداوند، ایتا حُکم که گَتِه فریاد همرَئِه فرشتگانِ رئیسِ آوازِ هَمرَه و خُدایِ شیپورِ اَوازِ هَمرَه، آسِمانِ جی جیر هَنه. و اَوّل مُردِگان مسیحِ دِلهِ زندهِ بونَن،

¹⁷ ایما، اَما که زنده ایم و بِجا بُمانِسّیم، اوشانه هَمرَه اَبرانِ دِلِه جآر بَبِردِه بونیم تا خُداوند رِه هوایِ دِلِه بِینیم، وَ اینجوری هَمَش خُداوَندِ هَمرَه دَریم.

¹⁸ پَس این گَبانِ هَمرَه، هَمدِیگَرِ تشویق هَکُنید.