اوّل تِسالونیکیان 3 - گیله ماز

¹ پس چون دِ نَتَّنِسّیم طاقت بیاریم، راضی هَبَیم که اَمَرِه آتِنِ شهرِ دِلهِ تنها بَنِن.

² اَما تیموتائوس رِه که اَمی اَداش و خُدای همکار مسیحِ اِنجیلِ کارِ دِلِه هیسَه رِه، شِیمی ور روانه هَکوردیم تا شِمِره شیمی ایمان دِلِه تَقویت و تشویق هَکونه،

³ تا هیچکَس این سَختیانِ وَسین سُست نَبوُ، چون شُما خودِتان خوُب دانید که ایشان اَمَرِه تعیین هَبا.

⁴ چون موقِه ایی که شِیمی هَمرَه دَبِیم، پیشتَر شِمِرِه باگوتیم که بایسّی سختی بَکشیم، هَمونجور که دانید، اینجورَم هَبا.

⁵ اینِه وَسین، چون دِ نَتَّنِسَّم طاقت بیارِم، تیموتائوسِ روانه هَکُردَم تا شیمی ایمان جی باخَبَر هَبوُم، چون اونه جی تَرسِنه بام که اون وَسوسِه گر یعنی اِبلیس یِجوری شِمِره وَسوسِه هَکُردهِ بو، وَ اَمیِ زَحمت هَدر بَشَه بو.

تیموتائوسِ خَبر که دِلگرمی دَنهِ

⁶ وَلی اَسِه که تیموتائوس شیمی وَرِ جی اَمیِ وَرجه وَگَرسِّه و شیمی ایمان و مُحبتِ جی اَمرِه خُجیرِ خَبر بیاردِه، و خَبر هَدَه که شُما هَمَش اَمیِ جی خوبی یه هَمرَه یاد کانید و همونجور که اَما شیمی بَدییَنِ وَسین ذوق داریم شما هَم اَمیی بَدییَنِ وَسین ذوق دارین.

⁷ اِی اَداشان، اینِه وَسین تمام اَمیِ سختیها و مُصیبتهایِ دِلهِ، شیمی جی و شیمی ایمان جی تَسلّی بِیتیم.

⁸ اَسِه تانیم ایتا نَفَسِ راحَت بَکِشیم چونکه شُما خُداوندِ دِلهِ قائم بییَسَید.

⁹ چِطور تانیم این هَمه خُشحالی ایی که شِیمی خاطری اَمی خُداوندِ وَرجه اَمیِ نصیب هَبا، خُدا رِه شُکر هَکُنیم؟

¹⁰ اَما شُو و روز دِل و جانِ هَمرَه دُعا کانیم تا شِمِره رو در رو بِینیم و هر کَمِ و کسری که شیمی ایمان دِلِه دَرِه رِه، برطرف هَکُنیم.

¹¹ اَسِه اَمیی پیَر، خودِ خُدا، و اَمی خُداوند عیسی، اَمیی راهِ شیمی سَمت هموار هَکونه.

¹² وَ هَمونجور که اَمی مُحبت شِمِره بیشتر بونه، خداوند شیمی مُحبتِ، هَمدِیگر و تمام مَردُم وَسین زیاد و سرمشت هَکونه.

¹³ و شِیمی دِلِ پایدار هَکونه، تا اون موقِه که اَمیِ خُداوند عیسی تمامِ خودِشِه مُقدَّسین هَمرَه هَنهِ، اَمیِ خُدا، آسمانی پیَرِ حضور بی عیب و مُقدّس هَبین.