اوّل تِسالونیکیان 2 - گیله ماز

پولُس خِدمت تَسالونیکی یه کِلیسایِ وَسین

¹ اِی اَداشان، شُما خودتان دانید که اَمیِ بَموُئَن شیمی ور بیخُدی نَبا.

² بلکه هر چَن پیشتَر فیلیپی یه شهرِ دِلِه عذاب بَکِشییَیم و هَمونجور که دانید، اَمَرِه بَدی هَکُردنِ، جوریکه خِجالت آور با، ولی اَما اَمی خُدایِ کُمکِ هَمرَه جُرأت هَکردیم تا خُدایِ اِنجیلِ خیلی مُخالفتهای هَمرَه شِمِره اعلام هَکنیم.

³ چون اَگه شِمِرِه تشویق کانیم، خطا یا ناپاکی یا گول بَزَئن وَسین نیِه،

⁴ بلکه اون آدمانِ مِثان گَب زَنیم که خُدا اوشانه سَر مُهر تَائید بَزَه تا اِنجیلِ کارِ انجام هَدیم، پس اَما آدَمانِ راضی هَکوردَنِ دُمّال دَنییَیم، بلکه خُدایِ راضی هَکُردَنِ وَسین هیسِه، که اَمیِ دِلِ آزمون کانه.

⁵ شما خوب دانید که اَما هیچ وخت چاپلوسی یه هَمرَه گَب نَزَییم، و خُدا سَر شاهدِ- وانمود هَکوردَنِ هَمرَه ایتا سرپوش مِثان طَمَعِ وَسین سود نَبِردیم.

⁶ اَما اینهِ دُمّال دَنییَیم که یِنفر اَمَرِه جآر بَبِره، چه شِیمی جی و چه بَقیِه یه جی. هر چَن که اَما مَسیح رَسولان مقامِ دِلهِ این حَقِّ داشتیم که اینه شِیمی جی بِخوایم

⁷ ولی اَما ایتا مآره مِثان که خودشه وَچِه شانِ رِه تَر و خُشک کانه شیمی هَمرَه ملایمتِ هَمرَه رفتار هَکردیم

⁸ اَما آنقَدَر شِمِره دوس داشتیم، که ذوقِ هَمرَه حاضر بِیم نه فقط خُدایِ اِنجیلِ شِمِره بَرسانیم، بلکه اَمی جان جی هَم شیمی راههِ دِلِه بُگذَریم، چون شُما خِیلی اَمِرِه عزیز هیسین.

⁹ چون شُما اِی اَداشان، اَمی زحمت و کار هَکُردن شیمی یاد دَرِه، که شُو و روز کار کانِه بِیم تا اون موقِه که خُدایِ اِنجیلِ شِمِرِه اعلام کانیم هیچکسِ سَربار نَبیم.

¹⁰ شُما شاهِدین و خُدا هم شاهدِ که اَما چِطور شُما ایماندارانِ هَمرَه مُقدّس و صالح و بی عیب رفتار هَکُردیم.

¹¹ چون شُما دانید که چِطور ایتا پیَرهِ مِثان که خودشه وَچِه هان هَمرَه رفتار کانه،

¹² اَما هر کدام از شِمرِه ایتا ایتا تشویق هَکردیم و تَسلّی هَدَیم و سِفارِش هَکُردیم تا اونجور که خُدایِ لایقِ زندگی هَکُنید که شِمِره خودشه پادشاهی و جلالِ وَسین دُخواندِنهِ.

¹³ اَما هَم همَش خُدا رِه اینهِ خاطری شُکر کانیم، که اون موقِه که خُدایِ کلامِ قبول هَکُردین، اون کلامی که اَمی جی بِشنَوِسّین، اونِ نه آدمی یه کلامِ مِثان، بلکه خُدایِ کلامِ مِثان قبول هَکُردین، همونجور که حقیقتن هم هیسِه، که شُما ایماندارانِ میَن کار کانه.

¹⁴ چون اِی اَداشان، شُما خُدایِ کلیساها که یَهودیه منطقه یه دِلِه مسیحْ عیسی یِه دِلهِ دَرَن جی، سَرمشق بِیتین: چون شُما هَم شیمی هموطنِانِ جی، همون عذابا رِه بِدییَین که اوشان یَهودیِانِ جی بَدییَن،

¹⁵ اوشانَ جی که خُداوند عیسی و پیغمبَرانِ بَکوشتَن و اَمَرِه هَم دِرگا هَکُردَن. اوشان خُدا رِه راضی نُکانَن و تمام مَردُم هَمرَه دُشمَنی کانَن،

¹⁶ وَ نُزارنَن اَما غیر یهودیِانِ هَمرَه گَب بَزنیم تا نِجات هَگیرَن- اینجوری هَمَش خودِشانِه گُناهِانِ کیله رِه لَب به لَب پُر کانَن. وَلی سَرآخَر خُدایِ غَضَب اوشانه سَر بوما.

¹⁷ وَلی اِی اَداشان، اوجه یه جی که یه مدّتِ کَمی شیمی جی سیفا بِیم، البته جسماً و نه قَلباً، خیلی ذوق و شوقِ هَمرَه تَقلّا هَکردیم تا شِمِره رو در رو بِینیم.

¹⁸ چون اَما خَسّیم شیمی ورجه بیئیم - مَن، خودَم پولُس، چَن دفه خَسَّم بییَم - ولی شِیطان نُذاشته.

¹⁹ چون اَمی اُمید و خُشحالی و اِفتخارِ تاج، اَمی خُداوند عیسی یِه پِیش وختی که بیه چیِه؟ مَگِه شُما نییَین؟

²⁰ چون شُما اَمیِ جلال و خُشحالی هیسین.