اوّل یوحنا 5 - گیله ماز

دُنیا رِه حریف بونه

¹ هر کی ایمان داره عیسی همون مَسیحِ موعودِ، خُدایِ جی دُنیا بوما؛ هر کی پیَرِ محبت کانه، اونیکه اونه جی دُنیا بوما رِه هَم محبت کانه.

² اَما ایجه یه جی دانیم خُدایِ وَچِه هان رِه محبت کانیم که خُدا رِه محبت کانیم، و اونه اَحکامِ جی اِطاعَت کانیم.

³ چون خُدایِ محبت هَکوردَن اینه که اونه اَحکامِ عمل هَکُنیم. وَ اونه اَحکام سنگین نیِه.

⁴ چون هر کی خُدای جی دُنیا بوما بو، دُنیا رِه حریف بونه. اَمیی ایمان، اون پیروزی هیسه که دُنیا ره شکست هَدَه.

⁵ کی تانهِ دُنیا رِه حریف هَبو؟ اِلا اونکه ایمان دارِه عیسی خُدایِ ریکائِه؟

⁶ اون اونیِکه اُو و خونِ هَمره بوما، یَعنی عیسیِ مَسیح. نه فقط اُویِه هَمره، بلکه اُو و خونِ هَمره؛ وَ خُدایِ روحِ که گَواهی دَنه، چون خُدایِ روح، حَقیقَتِ.

⁷ چون این سِه تا هیسَن که گَواهی دَنَن:

⁸ خُدایِ روح و اُو و خون؛ وَ این سِه تایه گَواهی یکی هیسِه.

⁹ اَگه اَما آدَمانِ گُواهی رِه قبول کانیم، خُدایِ گُواهی گَت تَرِه، چون گُواهی ایِه که خودِ خُدا خودشه ریکایِ بارِه هَدَه.

¹⁰ هر کی خُدایِ ریکا رِه ایمان دارِه، این گُواهی رِه خودشه دِلِه دارِه. اونیکه خُدا رِه ایمان نیارِه اونه دُروزَن بِشمارِسِّه. چون اون گُواهی ایی که خُدا خودشه ریکایِ بارِه هَدَه رِه قبول نَکُردِه.

¹¹ اون گُواهی اینه که خُدا اَمَرِهِ اَبدی زندگی هَدَه، وَ این زندگی اونه ریکایِ دِلِه دَرِه.

¹² اونیکه ریکا رِه دارِه، زندگی رِه دارِه، وَ اونیکه خُدایِ ریکا رِه نِداره، زندگی رِه نِداره.

تا بِدانید

¹³ مَن این چیزان رِه شِمِره نِویسِنِم که خُدایِ ریکایِ اِسمِ ایمان دارِین، تا بِدانید که اَبدی زندگی رِه دارِین.

¹⁴ این همون اطمینانیه که اونه وَرجه داریم، اگه اَما طِبق اونه اِرادِه یِچی بِخوایم، اون اَمَرِهِ اِشنَوِنِه.

¹⁵ وَ اَگه دانیم که هر اونچه اونه جی بِخوایم اون اَمَرِه اِشنَوِنِه، پَس مَطمَئنیم اونچه که اونه جی بِخَسّیم رِه، بِیتیم.

¹⁶ اَگه یِنفر بِینهِ اونه اَداش گُناهی کانه که به مرگ خَتم نَبونه، دُعا هَکونه و خُدا اونه زندگی دَنه. اینه اونه بارِه گونَم که اونِ گُناه به مرگ خَتم نَبونه. گُناهی دَرِه که به مرگ خَتم بونه، مَن اینجور گُناه بارِه نَگونَم که بایسّی دُعا هَکُردَن.

¹⁷ تمام نادُرسِّ کار گُناهِ، وَلی گُناهی هَم دَرِه که به مرگ خَتم نَبونه.

¹⁸ اَما دانیم که هر کی خُدایِ جی دُنیا بوما بو، گُناه رِه اِدامِه نَدِنه، بلکه عیسی که ’خُدایِ جی دُنیا بوما‘ اونه حِفظ کانه و اون شَریرِ دَس اونه نَرِسِنِه.

¹⁹ اَما دانیم که خُدایِ جی هیسیم و تمام دُنیا اون شریرِ قُدرتِ جیر دَرِه.

²⁰ هَمینجور هَم دانیم که خُدایِ ریکا بوما و اَمَره فَهم هَدَه تا اونکه حقیقت رِه بِشناسیم، وَ اَما اونه دِلِه که حَقیقیِه دَریم، یَعنی اونه ریکا عیسی مَسیح دِلِه. اون خُدای حَقیقی واَبدی زندگیه.

²¹ اِی کوچِ وَچِه هان، شِمِرِه بُتِشانِ جی حِفظ هَکُنید.