اوّل یوحنا 4 - گیله ماز

روحِشانِ آزمون هَکُنید

¹ اِی عَزیزِان، هر روحی رِه باوَر نَکُنید، بلکه روحِشان رِه آزمون هَکنید که خُدایِ جیه یا نه. چون دُنیایِ دِلِه خیلی دُروئی پِیغَمبَران دَرِن.

² خُدایِ روح رِه اینجوری اِشناسِنیم: هر روحی که اعتراف هَکونه عیسی مسیح آدَم جِسمِ دِلِه بوما، خُدایِ جییه.

³ وَ هر روح که عیسی رِه اعتراف نَکُنِه، خُدای جی نیِه. این همون روحِ ’ضِدِّ مسیحِ‘ که بِشنَوِسّین هَنه و اَلآن هَم دُنیایِ دِلِه دَرِه.

⁴ اِی کوچِ وَچِه هان، شُما، خُدایِ جی هیسین و اوشانه حریف هَبَین، چون اونیکه شِیمی دِلِه دَرِه اونه جی که دُنیایِ دِلِه دَرِه گَته تَرَه.

⁵ اوشان دُنیایِ جی هیسیَن، اینه وَسین اونچه که گونَن دُنیایِ جییه و دُنیا اوشانه گوش دَنه.

⁶ اَما خُدایِ جی هیسیم. اونیکه خُدا رِه اِشناسِنِه، اَمَرِه گوش دَنه؛ اونیکه خُدایِ جی نیِه، اَمَرِهِ گوش نَدِنه. اینجوری حَقیقتِ روح و گمراهی یه روح رِه هَمدیگَرِ جی اِشناسِنیم.

خُدا مُحَبتِ

⁷ اِی عَزیزِان، بیئِین هَمدِیگَرِ مُحبت هَکُنیم، چون مُحَبت خُدایِ جییه و هر کی مُحَبت کانه، خُدایِ جی دُنیا بوما و خُدا رِه اِشناسِنِه.

⁸ اونیکه مُحبت نُکانه، خُدا رِه نِشناختِه، چون خُدا مُحَبتِ.

⁹ خُدایِ مُحبت اینجوری اَمییِ میَن ظاهِر هَبا که خُدا خودشه یِدانه ریکا رِه دُنیایِ دِلِه روانه هَکوردِه تا اونه طَریق زندگی بِداریم.

¹⁰ مُحَبت هَمینِه، نه اونکه اَما خُدا رِه مُحَبت هَکُردیم، بلکه او اَمَرِه مُحَبت هَکُردِه و خودشه ریکا رِه روانه هَکوردِه تا اَمیی گُناهِانِ کَفّارِه هَبو.

¹¹ اِی عَزیزِان، اَگه خُدا اینجوری اَمَرِه مُحبت هَکُردِه، اَما هَم بایسّی هَمدِیگَرِ مُحَبت هَکُنیم.

¹² هیچکس هیچ وَخت خُدا رِه نَدیه؛ اَگه هَمدیگَرِ مُحبت هَکُنیم، خُدا اَمیی دِلِه ماندِنه و اونه مُحبت اَمیی دِلِه کامل بونه.

¹³ ایجه یه جی دانیم که اونه دِلِه ماندِنیم و او اَمیی دِلِه، چون اون خودشه روحِ جی اَمَرِه هَدَه.

¹⁴ وَ اَما بَدییَیم و گَواهی دَنیم که پیَر، خودشه ریکا رِه روانه هَکوردِه تا دُنیایِ نِجات دَهندِه هَبو.

¹⁵ اونیکه اعتراف کانه عیسی خُدایِ ریکائِه، خُدا اونه دِلِه ماندِنه و اون خُدایِ دِلِه.

¹⁶ پَس اَما اون مُحبتی که خُدا اَمَرِه دارِه رِه بِشناختیم و اونِه باوَر داریم. خُدا مُحبتِ و اونیکه مُحبتِ دِلِه ماندِنهِ، خُدایِ دِلِه ماندِنهِ و خُدا اونه دِلِه ماندِنهِ.

¹⁷ اینجوری مُحبَت اَمیی دِلِه کامِل بونه تا داوَری روز مُطمئن هَبیم. چون این دُنیایِ دِلِه اَما هَمونجورییَیم که اون هیسه.

¹⁸ مُحبتِ دِلِه تَرس دَنیِه، بلکه مُحبتِ کامِل تَرسِ دِرگا کانه؛ چون تَرس تَنبیهِ جی سَرچِشمِه گیرنِه و اونیکه تَرسِنِه، مُحبتِ دِلِه کامِل نَبا.

¹⁹ اَما مُحبت کانیم چون اَوَّل اون اَمَرهِ مُحَبت هَکُردِه.

²⁰ اَگه کَسی گونِه که خُدا رِه دوس دارَم، وَ خودشه اَداشِ جی بیزارِ، اون آدَم دُروزَنِه. چون اون کسی که خودشه اَداش که دینِه رِه دوس نِداره، نَتَّنِه خُداییِ که نَدیه رِه، دوس بِدارِه.

²¹ اَما این حُکمِ اونه جی بِیتیم که هر کی خُدا رِه محبت کانه، خودشه اَداش رِه هَم بایسّی محبت هَکونه.