اوّلین نامِه قُرنتیانی سِه 5 - گیله ماز

بی عِفَتی کلیسایِ دِلِه

¹ راسّی خَبِر بَرِسییَه که شیمی میَن بی عفتی دَرِه، اون هم جوریکه حتّی بُت پَرسّان هَم نَتَّنِن اونه تحمل هَکونَن. چون بِشنَوِسَّم ایتا مَردَای خودشه زَن پیَر هَمرَه دَرِه.

² و شُما هم فَخر کانید! مَگِه نَباید ماتَم هَگیرین و اونیکه اینجور هَکُردِه رِه شیمی میِن جی دِرگا هَکُنید؟

³ چون هر چَن مَن جِسمِ دِلِه اوجه دَنییَم، وَلی روحِ دِلهِ شِیمی همرَه دَرَم، وَ اَلآن، یه یَنفرِ مِثان که اوجه دَرِه، پیشتر می قضاوت رِه اونه بارِه که این کارِ هَکُردِه اعلام هَکوردَم،

⁴ وَختی شُما خداوند عیسی مسیح اسم هَمرَه همدیگر هَمرَه جَم بونید، و من خداوند عیسی مسیحی قوَّت هَمرهَ روحِ دِلهِ شِیمی میَن دَرِم،

⁵ شما بایسّی این مَردَای رِه شِیطانِ دَس بِسپارین تا اونه جسم بَکوشتَنِ هَمرَه، اونِه روح، خُداوند عیسی یه روزِ دِلهِ نِجات هَگیره.

⁶ شِیمی فخر هَکُردَن اَصلاً دُرس نیِه. مَگِه نِدانین که یه میثقلی خَمیرمایه تانهِ تمام خمیرِ ور بیارِه؟

⁷ شِمِرِه کُهنِه خَمیرمایه جی پاک هَکُنید تا تازه خمیر هَبین، هَمونجور که واقعاً هَم فطیرِین. چون مَسیح، اَمیی پِسخِ وَرِّه، قُربانی هَبا.

⁸ پَس بییَئین عید رِه نه کُهنِه خَمیرمایه هَمرَه، یَعنی بدخواهی و شِرارَتِ خمیرمایِه، بلکه راسّیی و صداقَتِ فطیرِ نانِ هَمرَه جشن بَگیریم.

⁹ می قَبلی نامِه یه دِلِه، شِمِره بَنویشتَم که بی عفتانِ هَمرَه رفت و آمد نَکُنین.

¹⁰ وَلی اَصلاً می مَنظور این نَبا که این دُنیایِ بی عفتان هَمرَه، حریصِان یا حیله گران و بُت پَرَسّان هَمرَه رفت و آمد نَکُنین، چون اینجوری بایسّی دُنیایِ جی دِرگا بیشین.

¹¹ وَلی اَلان شِمِرِه نِویسِنِم که اونه هَمرَه که خودِش رِه اَداش دُخواندِنهِ، وَلی بی عفت، یا حریص، بُت پَرَسِ و فاش دَنه، عرق خور یا حیله گر هیسه، رفت و آمد نَکُنین و اینجور آدَمِ هَمرَه حتّی همسُفرِه هم نَبین.

¹² چون مَن چیکار دارَمِ که دِرگایِ مَردُم بارِه قضاوت هَکُنَم. مَگِه قضاوت اوشانه بارِه که کلیسای دِلهِ دَرِن، شِیمی وَظیفِه نیِه؟

¹³ خُدا خودِش، دِرگای مَردُمانِ بارِه قضاوت کانه. پَس «اون شرورِ آدَمِ شیمی میَن جی دِرگا هَکُنید.»