ሶፎናሳ ቲንቢቴ 2 - Geeshsha Maxaafa

¹ Intteno yeellay baynda deretoo! Ane issi bolla shiiqite!

² Bashsha gallassay gakkanaappe kasetidi, he gallassay suulla mala denththi dhayssontta dishin, GODAAPPE mino hanqoy intte bolla yontta dishin GODAAPPE bashsha gallassi intte bolla gakkontta dishin shiiqite.

³ Intteno biitta bolla diza ashketoo; iza azazokka polizaytoo! GODAA koyite; Xilloteththinne ashketeth koyite; GODAA hanqo gallassafe intte attanaakko oonee erizay!

Filisxeeme Dere Bolla Yootettida Pirda

⁴ Gaazay bula biitta gidana; Asqeloonaykka laaletta attana. Azaxooney seeta gallas kayzana. Aqarooney shodettana.

⁵ Intteno abba achchan dizaytoo! Kelite dere asatoo, inttes aayye ana! Filisxeeme dere asay diza Kanaane biittayee! ne bolla yootettida GODAA qaalay hayssafe kaallizayssa; «Ta nena mulera dhayssana; nenan diza asappe attana asi deenna.

⁶ Kaalite asay diza abba achcha biittay heenththanchchata duussasonne dorsa yire gidana.

⁷ Hessika Yuhudappe casha attidaytas gidana; isttika heen baas aqota demmana; Gadey qammishin Asqeloona kataman diza keeththatan aqana; GODAY istta Xoossay istta naagana; isttafe di7ettidayssaka isttas zaarana.»

Mo7aabe Bollanne Amoone Bolla Yootettida Pirda.

⁸ GODAY, «Mo7aabe asay cayizayssanne Amoone asay qidhizayssa ta siyadis. Ta deraa cayida; istti ta deraa bollaka mandida» gees.

⁹ Hessa gishshas GODAY Ubbaafe Wolqqama Isra7eele Xoossay, «Tani ta de7o Xoossateththan caaqqays; Mo7aabey Sodoome mala Amooney Gamoora mala, sharafay may7idaso malanne maxine bookki ekkida olla mala mernaas bula gidana. Ta asaappe casha attidayti istta haaro bonqqananne istta biittaa laattana» gees.

¹⁰ Bantta otoroteththafe dendidayssan istti Ubbaafe Wolqqama Xoossa deraa cayida gishshassinne qidhida gishshas hessi istta bolla gakkana.

¹¹ GODAY he biitta eeqa xoossata ubbaa dhayssiza wode izi istta yashissizayssa gidana; Abba achchan diza dereti ubbay issoy issoy ba dizason dishe izas goynnana.

Tophphiya Bollanne Asoore Bolla Yootettida Pirda

¹² «Intteno Tophphiya asatoo! Intte ta mashshan siifettana.»

¹³ Izi ba kushe pudeha baggan diza dereta bolla denththana; Asoore dhayssana. Nannawekka bulasana; bazzo biitta mala melissana.

¹⁴ Dorsa wudeynne mehe wudey, medheteththaafe ubbaa qommoy heen shempana. Guttoynne Quxarsi izi gimbetan aqana. Istta waasoy maskootetara seetettana. Gimbeza laaleththi issaa issaa pengen doorettana; keeththata tookki eqqida ziga godati kallottana.

¹⁵ Kase ufayssan diza katamaya hanno; izakka ba wozinan, «Ta xalla days; taappe haray oonikka deenna» gidaara histtiin ha7i waanada wora do7ati guurizaso bazzo biitta gida attadee? Izi achchara aadhdhi biza ubbay izo qidhishe ba kushe wuxxees.