ዛካራሳ ቲንቢቴ 9 - Geeshsha Maxaafa

Isra7eele Asa Morkketa Bolla Yaana Pirda

¹ Isra7eele asa ubbaa ayfey pude GODAAKKO xeellees; hessa gishshas GODAY kase yooti woththida mala Sedireeke bollanne Damasqo bolla pirdana.

² Ha pirdazikka Damasqo zawan diza Hamaate bolla, aadho erateththi diza Xiroose katamata bollanne Sidoona katamata bolla gakkana.

³ Xiroose katamaya baas mino miixa giigsadus; bira biitta mala, worqqaka gudulla mala shiishsha guuppadus.

⁴ Gido attiin GODAY iza guuppidayssa woththi ekkana; izis abba giddon diza wolqqa ubbaa dhayssana; izakka taman xuugetta dhayana.

⁵ Asqeloonay hessa be7idi yayyana; Gaazay meton un7ettana; hessaththoka Aqarooney hidotakka qanxxana; Gaazay qasse kawoy bayndaaro gidana; Asqeloonay bula gidana.

⁶ Walaka derey Azaxoone oykkana; ceeqettiza Filisxeeme asaa ta dhayssana.

⁷ Tani istta doonappe suuth, istta gacoppe montta mala digettida kath diggana; hankko attidayti ta dere gidana; Yuhuda biittan halaqatana; Aqaroone asaykka Yaabuse asa mala gidana.

⁸ Tani gidikko ta keeththa bonqqiza wolqqamatappe naagana; hayssafe guye un7eththizay ta deraa laattenna. Tani ha7i minna naagays.

Buro Yaana Xiyoone Kawo

⁹ Hanne Xiyoone nayee keeha ufayetta. Hanne Yerusalaame nayee ufayssan ilila; xillonne ashshiza ne kawoy ashke gididi hareyonne harey gutte toggidi neekko yees.

¹⁰ Para-gaareta Efreemeppe ola parata Yerusalaameppe ta ekka dhayssana. Tani ola toorata menththereththana. Saroteth kawoteththatas awajjana. Izi abbaafe abban gakkanaas haarana; Efiraaxise shaafappe sa7a gaxa gakkanaas izi ayssana.

¹¹ Ta nenara suuththan caaqettida caaqoza gishshas haaththi baynda ollan qashettida asata ta birshada yeddana.

¹² Intteno hidotay diza qasho asatoo! Intte kase diza miixan simmite; kase inttes diza aqota dakko histta ta inttes zaarana.

¹³ Yuhuda wondafe mala Efreemekka yiishsha mala ta go7ettana; hanne Xiyoone tani ne nayta Girike dere bolla denththeththana; nenakka tani wolqqama mashsha mala histta go7ettana.

Goday Qonccana

¹⁴ GODAY istta bolla qonccana; iza yiishshay wolqqanththa mala popol7u gaana; Ubbaafe Wolqqama GODAY xurumba punnana. Dugehappe keziza gote carko mala izi baana.

¹⁵ Ubbaafe Wolqqama GODAY isttas gondalle gidana; istti ba morkketa ubbaa dhayssana; istti yanbarshan olizayta yedhdhana; istti woyne ushshu uyida asa mala waassana; yarsho suuththi kere kumi yarshosoho bolla gukkiza mala istta morkketa suuththika gukkana.

¹⁶ He wode GODAY istta Xoossay ba deraa baas wude mehe histti ashshana; kallachcha bolla diza seeloy xolqiza mala isttika Xoossa deren phoollana.

¹⁷ Istti ay mala lo7onne puula as gidaneeshshaa! Kaththi naateththata woyne ushshi geela7ota anqarsana.