ዛካራሳ ቲንቢቴ 2 - Geeshsha Maxaafa

Zakaraasi Ajjuutan Beyida Wadha Wodoro

¹ Qasseka ta ajjuutan wadha wodoro ba kushen oykkidayssa be7adis.

² Tanikka iza, «Ne awa bay?» ga oychchadis. Izi qasse, «Yerusalaame adussateththaynne aakoteththay aappun wadhakko wadhdha beyana bays» gides.

³ He tanara haasayza kiitanchchay bides. Hara kiitanchchayka izara gaagganaas yides.

⁴ Histtidi izas, «Woxxa baada hessa naateththa addezas, ‹Yerusalaamey izin diza asa daroteththafenne mehe daroteththafe dendoyssan katamaa yuushon gimbe dirsa koshshenna.

⁵ Tani tarkka izis tama dirsa gidana; izi giddon tani izis bonchcho gidana› gees gaada yoota» gides.

Betida Asaa Simo

⁶ GODAY ba deraa, «Ta kase inttena oyddu bagga laalladis; ha7i gidikko pudeha baggafe baqati kezite; haa yiite.

⁷ Hanne Xiyoone haa ya; Baabiloone macca naytara de7izaare istta giddofe baqata.

⁸ Ubbaafe Wolqqama GODAY: ba bonchcho qonccisana mala ba asaa bonqqidayta kawoteththaako tana kiittides; inttena bochchizay taas ayfe ciro bochchiza mala.

⁹ Hekko tani ta kushe istta bolla denththana; istta aylleti istta bonqqana; hessafe guye Ubbaafe Wolqqama GODAY tana kiittidayssa intte erana.

¹⁰ «Hanne Xiyoone nayee ane ilila; ufayetta; tani yaada ne giddon daana» gees GODAY.

¹¹ He gallas daro kawoteththati GODAAKKO shiiqidi iza dere gidana; izikka ne giddon de7ana; Ubbaafe Wolqqama GODAY tana neekko kiittidayssa nekka erana.

¹² GODAY geeshsha biittayn Yuhuda baas buzo histti laattana; Yerusalaamekka zaari doorana.

¹³ GODAY geesh gidida basozappe dendida gishshas asho may7ida ubbay iza sinththan co7u go.