Siiqo Saba 8 - Geeshsha Maxaafa

¹ Ne ta aayey dhanth dhammi diccida ta isha mala gididaakko ta nena ogen demmada yeera ekkidaakko tana oonikka kadhennakoshin!

² Tana tamaarsida ta aayeyso ta ne kushe oykkada efanakkoshin; ne uyanaas oroomaaneppenne woyneppe gum7ettida lo7o ushshu ta nees immanakkoshin.

³ Ba hadirsa kushe bolla tana borkotissees; ushachcha kushenkka tana qoommees.

⁴ Intteno Yerusalaame geela7otoo! Siiqozi baas dosidi dendana gakkanaas iza intte beegoththontta mala tani inttena hadara gays» gadus.

Laggeti

⁵ «Ba siiqo laggeza bolla zemppada, bazzofe yizaara hanna oonee?» gida. «Beni ne aaya nena miixatta yelida appile miththa garsafe ta nena beegoththa denththadis.

Geela7oya

⁶ Mernaa siiqon ne wozinan tana woththa; tana xalla ne qese bolla maatame mala shoca; ays giikko siiqoy hayqo mala mino; qanaatey duufo mala menxe iita; izi lacoykka tama laco mala popol7u gees.

⁷ Haaththa daroy siiqo tama toyssanaas dandayenna; di7oykka meeccidi efenna; asi baas diza miish ubbaan siiqo shammanaas koykko siiqoy miishshan beettontta gishshas asay qilcci kaa7ees» gadus.

Laggeti

⁸ «Dhanththi uttontta qeeri michcha nuus dawus; azinay izo oychchiko nu izis ay ooththanee?

⁹ Iza gimbe gididaakko nuni izi bolla birappe shakko ooththana; iza geliza penge gididaakko nuni izi bolla Libaanoose zigappe sanqqa kessana» gida.

Geela7oya

¹⁰ «Be7ite tani gimbe; ta dhanththatikka shakko mala; tani ta siiqozara diza wode izi ufayssinne saroteth demmees.

¹¹ Solomoones Ba7aali-Hamoonen woyne tokkizasohoy dees; he woyne tokkizasohoza oosanchchatas kira immides; isttika hu7en hu7en shii bira izas eheettes.

¹² Gido attiin taas buzo gidida woyne tokkizasohoy dees; Solomoone neni shii bira ekka; oosanchchati 200 bira ekketto» gadus.

Panththazi

¹³ «Hanne ta mishirayee! Ne atakilte giddon dashe haasayza qaala ta laggeti siyana koyeettes; ane tanakka ne qaala cenggurssaa sissa» gides.

Geela7oya

¹⁴ «Ta siiqozoo! Taakko eeson haa ya! Sawo atakilteti mokkiza zumata bollara guppiza genessa woykko Wusha laaqqa misata» gadus.