Siiqo Saba 6 - Geeshsha Maxaafa

Laggeti

¹ «Maccassa ubbaafe lo7oyee! Ne siiqo laggezi awa bidee? Nunikka nenara issife koyanaas, izi awa baggara bidaakko nuus yoota» gida.

Geela7oya

² «Ta siiqozi dorsa wude heemmanaas lo7o ciishshata maxanaas shittos go7iza sawo maatay dizaso duge atakilte giddo wodhdhides.

³ Tani ta siiqozassa; izikka taassa; izi wudeza cilila maatan heemmees» gadus.

Panththazi

⁴ «Ta godee! Neni Tirxxa katamay lo7iza mala lo7aasa; Yerusalaame mala keeha kayshaasa; bandira tookkidi biza olanchcha mala yashissiza teemara daasa.

⁵ Woze nena ne ayfe taappe denththarkkii! Istti tana di7idi qasho as kessida; Ne binanay Gala7aade zumaappe duge wodhdhiza deysha wude misatees.

⁶ Istta giddon maynney baynda mentte mentte yeliza iskey diirettiin meecetti keziza booththa dorsa wudeta mala ne achchati tana ufaysseettes.

⁷ Ne shagalati ayfeso kammiza quraace giddora xeelliza wode oroomaane nam7u kessi phalqidaa misateettes.

⁸ Usuppun tammu macca kawoti, osppun tammu laggeththo maccassati, qasse qooday baynda geela7oti deettes.

⁹ Tani gidikko issiniyo xalla dosays; izi bolla ay wosoy deenna; iza haraphphe mala kaysha uttadus; iza ba aayeyska mexi issino; izo yelida aaya izo ubbaafe aaththa siiqawus. Geela7otikka izo xeellidi xeellidi sabbeettes; kawo machchetinne iza laggeththoti izo nashsheettes.

Laggeti

¹⁰ Hanna maalado xalqqe mala mokkizaara, agina mala phoollizaara, awa mala poo7izaara, bandira tookkidi biza olanchcha mala yashissizaara iza oonee?» geettes.

Panththazi

¹¹ «Tani shoobban tokettida atakilteta be7anaas, woyney aacidaakko, oroomaaneykka ciiyidaakko xeellanaas duge ochcholooney tokettizaso wodhdhadis.

¹² Tani qoppontta dishin, ta amoy tana efidi kawo para-gaareta bolla utissides» gides.

Laggeti

¹³ «Hanne Shulaame maccassayee! Haa simma; Nena nu lo7eththi xeellana mala haa simma» gida. «Daro asa sinththan yexxiza asa mala, tana Shulaame maccassayo ays xeelleetii?» gadus.