Siiqo Saba 5 - Geeshsha Maxaafa

Panththazi

¹ «Taas siiqo michcho gidida ta mishirayee! Tani ta atakilte giddo geladis. Ta karbbenne ta shitto ciish maxadis; Eessa ukeththaa ililozara gaththa madis; Ta woyne ushshaa, ta maaththaa uyadis» gides. «Intteno siiqettizaytoo! Kallana gakkanaas miite; alana gakkanaaska uyite» gida.

Laggeti Geela7oya

² «Tani omars dhiskadis; gido attiin ta wozinay beeggides; Ta siiqozi kare qoxxishe, ‹Taas siiqo michcho gidida mishirayee! Nenan wosoy baynda ta haraphpheyee! Nena shoobbays taas kareza doya; ta hu7ey kenchchon wooqqides. Ta binanaykka omarsa puusen musides› gishin siyadis.

³ Tani ta may7o kessadis; histtiin zaara may7oo? Ta tohokka meecettadis; qasse zaarada urqqasoo?

⁴ Ta siiqozi penge xoo7era kushe yeddides; histtiin taas maracen pol7u gides.

⁵ Hessafe guye ta siiqozas kare doyanaas dendadis; kareza doyana ta oykkishin ta kusheppe karbbey xokettides; ta biradhdhetappeka shittoy goggides.

⁶ Ta kareza doyshin ta siiqozi simmidi bichchides; iza qaala cenggurssa siyanaas keeha amottadis. Minththadakka koyadis; gido attiin demmanaas dandayabeekke; Xeygadis shin izi taas koyibeenna.

⁷ Katama naagizayti tana demmi wadhdhidi madunththida; katama gimbe naagizayti ta may7ida seelo may7oza qaari ekkida.

⁸ Intteno Yerusalaame geela7otoo! Intte ta siiqoza demmidaa gidikko tani iza siiqoppe dendidayssan hargidayssa hadara izas yootite» gadus.

Laggeti

⁹ «Hanne maccassa ubbaafe aadho lo7oyee! Tumu ne siiqo laggezi haratappe dummatizee? Neni hayssa mala nuna hadara gizay izi haratappe waaninee?» gida.

Geela7oya

¹⁰ «Ta siiqoy daro lo7onne mino; 10,000 attumasa garsan iza malay deenna.

¹¹ Iza hu7ey geeshsha worqqa misatees; iza binanaykka olossinne dum7a kareth misatees.

¹² Iza ayfeti shaafa lanqen diza haraphpheta malanne maaththan meecettida inqquta mala.

¹³ Iza shagalati mal7iza sawo maatata mala; dumma dumma qimameti tokettida atakilteso misateettes; iza metershati karbbe shittoy xokkiza suufe ciishsha mala lo7eettes.

¹⁴ Iza kusheti inqqun alleqettida worqqa guufe mala lo7eettes; iza bollay simpere geetettiza inqqun alleqettida danggarsa zaale mala lo7ees.

¹⁵ Iza tohoti worqqan tokettida, daldachcha tuussata misateettes; iza medhay Libaanoose zigan alleqettida Libaanoose zuma misatees.

¹⁶ Iza qaalay eessa mala mal7ees; iza bollay mulera kayshees; Intteno Yerusalaame geela7otoo, ta siiqozinne ta laggezi hayssa misatees» gadus.