Siiqo Saba 4 - Geeshsha Maxaafa

Panththazi

¹ «Ta godee! Ne ay mala lo7o! Neni ay mala giiga! Ne ayfeti ne ayfeso kammiza quraace giddora xeelliza wode haraphphe mala lo7eettes; ne binanay Gala7aade zumaara duge wodhdhiza deysha wude misatees.

² Istta giddon maynney baynda mentte mentte yeliza iskey diirettiin meecetti keziza booththa dorsa wudeta mala ne achchati tana ufaysseettes.

³ Ne metershati zo7o qacina mala lo7eettes; ne haasayza wode keehi ufaysseettes; ne shagalati ayfeso kammiza quraace giddora xeelliza wode oroomaane nam7u kessi phalqidaa misateettes.

⁴ Ne qoodhey shiyan qoodettiza gondalleti, ola massarati iza bolla kaqetti beettizanne ola miixa gidanaas oosettida Dawite gimbe misatees;

⁵ Ne dhanththati mentte yelettidi, suufe ciishshata giddon miza genessa laaqqata misateettes.

⁶ Qammay wonttana gakkanaas, dhumay aadhdhana gakkanaas karbbey diza zuma bollanne exaaney iza zumbulla bolla baada shempana.

⁷ Ta godee! Ne asateththay kumeth lo7o; ne bolla aykko wosoykka baawa.

⁸ Ta mishirayee! Libaanooseppe haa duge wodhdha; gaammoynne maahey dizaso Amaana zumaappe, Sanire zumappenne Hermoone zumaappe wodhdhada haa ya.

⁹ Taas siiqo michcho gidida ta mishirayee! Ne xeelliza xeeloynne ne qoodhen diza alleqoy ta wozina ekkides.

¹⁰ Taas siiqo michcho gidida ta mishirayee! Ne siiqoy tana ay mala ufayssizee! Ne siiqoy woyne ushshafe aadhdhi ufayssees; ne shittoy ubbaafekka aadhdhidi sawees.

¹¹ Ta mishirayee! Ne metershara eessa ililoy xokkees. Ne doonappe eessinne maaththi pulttees; ne may7o sawoy Libaanoose shitto mala sawees.

¹² Taas siiqo michcho gidida ta mishirayee! Ne taas dirsa giddon naagettiza atakilte mala, izas yuushoy shuurettida pultto haaththa malanne asi gakkontta piissa haaththa mala.

¹³ Ne aadhdha bizason mal7iza miththa ayfeti kumida; heytikka oroomaane atakiltesohota mala.

¹⁴ Nardoosey, laadey, sawo maataynne qarafay, qasseka exaane mala sawiza dumma dumma atakilteti deettes; haray qasse karbbey, godare uuththa ciishshaynne dumma dumma sawo atakilteti mokkeettes.

¹⁵ Neni atakilte ushshiza pultto haaththa mala; de7o haaththi keziza olla mala; Libaanoose zuma garsafe goggiza shaafa haaththa mala» gides.

Geela7oya

¹⁶ «Pudeha bagga carkozoo! Denda! Dugeha bagga carkozoo! Haa ya! Ta atakilte bolla carka! heerazi ubbay sawo tunnu go. Ta siiqozi ba atakilte giddo yo; doorettida miththa ayfetakka mo» gadus.