Siiqo Saba 3 - Geeshsha Maxaafa

Geela7oya

¹ «Omars kumeth ta hiixan ichchada, ta siiqoza demmanaas amottadis; minththadakka koyadis; gido attiin demmanaas dandayabeekke.

² Katama giddon diza ogetaninne dubbushata ubbaan yuuyadis; ta siiqoza demmanaas amottadis; minththadakka koyadis; gido attiin demmanaas dandayabeekke.

³ Katama yuuyi naagizayti tana demmida; tani isttas, ‹Ta siiqoza beyidetii?› gaada oychchadis.

⁴ Isttafe guuth aadhdha baada ta siiqoza demmadis; izi taappe kessi ekkontta mala minththada oykkadis; ta aayey keeth ekka efadis; ta yelettida kifile gelththadis.

⁵ Intteno Yerusalaame geela7otoo! Siiqozi baas dosidi dendana gakkanaas, iza intte beegoththontta mala, tani inttena genessataninne bazzo Wushatan amatays» gadus.

Laggeti

⁶ «Karbbefe, exaaneppenne zal7anchchata sawoppe giigettida shitto mala sawo tunnu gashenne cuwa mala tullu gashe bazzora yizaara hanna iza oonee?

⁷ Hekko be7ite, Solomoone para-gaareya yuussan dawus; Isra7eeleppe doorettida usuppun tammu ola asati izo azhabida.

⁸ Istti ubbayka mashsha oyth meezetida, ola erizaytanne omars yiza meto eqettanaas issoy issoy mashsha gixxida mala aqeettes.

⁹ Kawo Solomooney para-gaare giddon uttiza araatay Libaanoose miththafe oosettides.

¹⁰ Iza araata tuussati biran tiyettida; zemppozi worqqan alleqettides; uttizaasozi ochcha teera misatiza qacinappe oosettides; giddoza Yerusalaame geela7oti siiqos dadida afalan aleqissida» gida.

Geela7oya

¹¹ «Intteno Xiyoone geela7otoo! Izi keehi ufayettida iza bullachcha gallas iza aaya iza hu7en woththida kallachcha goxxi uttidayssa be7anaas Kawo Solomoonekko haa yiite» gadus.