Siiqo Saba 2 - Geeshsha Maxaafa

Geela7oya

¹ «Tani Lasharoonen mokkiza ciishsha malanne gadhan mokkiza suufe ciishsha mala» gadus.

Panththazi

² «Ta siiqoya maccassata garsan agunththa giddon diza lo7o ciish misatawus» gides.

Geela7oya

³ «Ta siiqoza tani naateththatara gaththa xeelliza wode, wora giddon diza appile misatees; tanikka keeha ufayettadis; tani iza kuwa garsan shempadis; mal7iza iza ayfezapeka ma kalladis.

⁴ Izi tana gibiras aaho keeththan gelththides; ba siiqo ta bolla bandira mala dhoqqu dhoqqu ooththides.

⁵ Tani iza siiqon oykettada hargadis; hessa gishshas tana zabibe ayfe mizidi gazidissite; appile mizidi tana beegoththite.

⁶ Ba hadirsa kushe bolla tana borkotissides; ba ushachcha kushen tana idimmides.

⁷ Intteno Yerusalaame yelaga maccassatoo! siiqoy baas dosidi dendana gakkanaas iza intte beegoththontta mala, tani inttena genessataninne bazzo wushan amatays.

⁸ Be7ite! Ta siiqoza cenggurssi zumata bollara pirishe, zumbullata bollara xongettishe yizayssi siyettees.

⁹ Ta siiqozi Wusha laaqqa woykko genessa laaqqa misatees. Be7ite! Izi nu keeththa daaranchchan eqqides; maskootera soo xeellees; magalasha xoo7era xuulungi xeellees.

¹⁰ Ta siiqozi tana, ‹Ta godee, denda! Ta lo7oyee! Haa ya! Ane issife boos.

¹¹ Beya, balgoy aadhdhides; iraykka aggides.

¹² Ubbason ciishshi ciiyides; mazamure yexxiza aginaykka gakkides; haraphphe yeththika nu biittan siyettees.

¹³ Balasey ayfe imo doommides; woyney ciiyides; iza ciishsha sawoy ubbason tunnu gees. Hessa gishshas ta godee, Denda; ta lo7oyee! Haa ya; ane issife boos› gees» gadus.

Panththazi

¹⁴ «Neni aafo doonan zaalla za7a giddon diza haraphphey mala; ane issito ne ayfeso tana bessa; ne qaala cenggurssikka tana sissa. Ays giikko ne cenggurssay tana ufayssees; ne ayfesoykka tana lo7ees» gides.

¹⁵ Nu woyne atakiltey ciiyides; hessa gishshas nu woyne atakilte giddo moorontta mala worakanatanne istta butulata woximaden oykkite.

Geela7oya

¹⁶ «Ta siiqozi taassa; tanikka izassa; cilila maata giddon izi ba mehe heemmees.

¹⁷ Omarsa dhumay qaarettanaashin, maalado carkoy carkanaashin, ta siiqozoo! Genessa mala woykko wusha laaqqa mala aafotiza zuma bollara woxxada haa simma» gadus.