Siiqo Saba 1 - Geeshsha Maxaafa

¹ Yeth ubbaafe aadhdhiza Solomoone mazamure.

Geela7oya

² «Ne siiqoy woyne ushshafe aadhdhi ufayssees; ne mettershan zaara zaaradakka tana yeera.

³ Ne tiyettiza shittoy ay mala sawizee! Ne sunththay xeygettiza wodekka ay mala ufayssizee! Geela7oti nena hessa gishshas siiqeettes.

⁴ Tana nenara ekkada ba; haa ya, ane nam7ay issife woxxoos! Ta kawoo, tana ne quruxo giddo gelththa» gadus. «Izan nuni ay keena ufayettidonii! Nuni iza siiqo woyne ushshafekka aaththidi nashshoos. Tumukka maccassay ubbay nena siiqanaas bessees» gida.

Laggeti Geela7oya

⁵ «Intteno Yerusalaame maccassatoo, siyite! Tani kareth gidikkoka mala lo7o. Ta kareththateththay Qeedaare dunkaane mala; gido attiin ta medhay kawo Solomoone keeththa magalashata mala.

⁶ Ta medha kareththiday awa seela; tani kareth gidida gishshas tana kadhopite. Ta aayi naa ishati tanara ooyettidi tana woyne atakilte naaganaas woththida; hessa gishshas tani tayssa naagabeekke.

⁷ Ta siiqozoo! Ane taas yoota; ne dorsa wude heemmizay awanee? Gallas awappe ne istta guurissizay awanee? Nena demmanaas ne laggeta wude kaallashe ays coo toylattiza maccassa mala gidoo?» gadus.

Panththazi

⁸ «Haa macca ubbaafe aadhdha lo7iza malanchchayee! Ta dizaso erontta aggiko dorsati bida geedo kaallada ya; ne deysha laaqqatakka heenththanchchata dunkaane matan heemma.»

⁹ «Ta godee! Gibxe kawos para-gaare goochchiza parata giddon diza macca paray mala lo7aasa.

¹⁰ Ne shagalasoy lozhzhu gides; ne qoodhey inqqu geetettiza seelon alleqettides.

¹¹ Nuni nees biran alleqettida worqqa geexe oosisana» gides.

Geela7oya

¹² «Kawoy maaddan utti dishin ta shitto sawoy keeththa giddo ubbaan tunnu gides.

¹³ Ta siiqozi ta dhanththata giddon diza sawiza karbbe xuntte mala.

¹⁴ Ta siiqozi En-Gaade geetettiza woyne tokkiza gaden mokkida bazzo ciishsha mala» gadus.

Panththazi

¹⁵ «Ta godee! Neni ay mala lo7ay! Neni ay mala lo7ay! Ne ayfeti haraphphe mala lo7eettes» gides.

Geela7oya

¹⁶ «Ta siiqozoo, nenikka ay mala lo7ay! Ne keeha lo7aasa; nu hiiththay cilila maata mala ufayssees» gadus.

Panththazi

¹⁷ «Nu keeththa tuussi Libaanoose ziga; kaaraykka xiiddan oosettides» gides.