ዬ ማጻፋ 98 - Geeshsha Maxaafa

Mazamure

¹ GODAAS ooraththa mazamure yexxite; gaasoykka izi malalisiza miish ooththides; iza ushachcha kusheynne iza geeshsha qesey izas xoono immides.

² GODAY ba ashshizayssa erisides; izi ba xilloteththaka kawoteththas qonccisides.

³ Izi Isra7eeleta siiqizayssanne isttas ammanettizayssa hassa7ides; sa7a gaxa gakkanaas diza asay ubbay nu Xoossay ashshizayssa be7ides.

⁴ Sa7a bollan diza as ubbay GODAAS ufayssan yexxite; qaala dhoqqu ooththidi ufayssa yeththan galatite.

⁵ Bagana diixxishe mazamuren GODAA galatite;

⁶ Dinkenne zaye punnishe nu kawaa GODAA sinththan ufayssan ililite.

⁷ Abbaynne abba giddon kumida ubbay guummo! sa7aynne sa7a bollan diza ubbay yexxo!

⁸ Shaafati issife bantta kushe baqqetto! zumati GODAA sinththan issife ufayssan yexxetto!

⁹ GODAY sa7a bollan pirdanaas yaana; izi ha sa7a bolla xilloteththan asa bollaka suureteththan pirdana.