ዬ ማጻፋ 96 - Geeshsha Maxaafa

¹ GODAAS ooraththa mazamure yexxite; sa7an de7iza asawu! Ubbay GODAAS yexxite.

² GODAAS yexxite; iza sunththaa sabbite; izi ashshizayssa hach hach yootite.

³ Kawoteththata giddon iza bonchcho qonccisite; asa ubbaa giddon malalisiza iza ooso awajjite.

⁴ GODAY gita; gita galataykka izas bessees; ubba xoossatappe aadhdhidi izi yayettanaas bessees.

⁵ Dere asay goynniza xoossati ubbay eeqa xoossata; gido attiin GODAY salota medhdhida Xoossa.

⁶ Bonchchoynne teemay iza yuushon dees; minoteththaynne puulay iza Keeththan dees.

⁷ Intteno biitta bolla diza dere ubbatoo! GODAA bonchcho gishshassinne iza wolqqa gishshas galatite.

⁸ Iza sunththas bessiza bonchcho GODAAS immite; Yarsho ekkidi iza Keeththa zago gelite.

⁹ Iza geeshshateththa puulan GODAAS goynnite; biittan de7iza as ubbay iza sinththan kokkorite.

¹⁰ Kawoteththata giddon, «GODAY kawotides! Sa7ay minni eqqides; mulekka qaaxxenna; izi as ubbaas issi gina pirdana» giite.

¹¹ Saloynne sa7ay ufayetetto! abbaynne iza giddon diza ubbati guummetto!

¹² Goshsha gadeynne iza bolla diza ubbay ufayetto! Woran diza mith ubbay iza sinththan ufayssan yexxana.

¹³ Ays giikko GODAY yaana; izi sa7a bollan pirdanaas yaana; izi ha sa7a bolla xilloteththan, asa bollaka tumateththan pirdana.