ዬ ማጻፋ 95 - Geeshsha Maxaafa

¹ Haa yiite! Ane GODAAS ufayssan yexxoos; nuna ashshiza zaallas ililoos.

² Ane iza sinth galatara shiiqoos; galata mazamure ufayssan yexxoos.

³ Gaasoykka GODAY wolqqama Xoossa, xoossata ubbaa bollaka wolqqama kawo.

⁴ Biitta ciimmati iza kushen deettes; zuma xeeratikka izassa.

⁵ Abba haaththi izassa; hessa iza kusheti medhdhida; biittaaka medhdhiday iza.

⁶ Haa yiite! Hokkidi ane izas goynnoos; nuna medhdhida GODAA sinththan gulbatoos.

⁷ Izi nu Xoossa; Nuni iza qooron heemettizayta; nuni izas dorsa wudeta. GODAY inttena gizayssa hach siyite!

⁸ «Kase intte aawati Maasaninne Mariiban ooththoyssaththo intte wozina muumisopite.

⁹ Istti ta ooso be7idikka tanara eqettidanne tana paaccida.

¹⁰ He yeletaa bolla tani oyddu tammu layth hanqettadis; tanikka, ‹Istti ubba wode bantta wozinan baliza asa; istti ta oge eribeettenna› gadis.

¹¹ Hessa gishshas tani, ‹Istti ta shemposo mulekka gelettenna› gaada hanqetta caaqqadis.»