ዬ ማጻፋ 94 - Geeshsha Maxaafa

¹ Abeet GODAWU! Neni halo kessiza Xoossa; Abeet halo kessiza Xoossawu! Ne bonchcho qonccisa.

² Abeet sa7a pirdizayssoo! Denda! Otoranchchatas bessiza qixaate imma.

³ Abeet GODAWU! Iitati awude gakkanaas gam7anee? Istti awude gakkanaas ufayettanee?

⁴ Iita ooththiza ubbati bantta otoro qaalan haasayeettes; coo ceeqetteettes.

⁵ Abeet GODAWU! Istti ne deraa liiqiseettes; asaa toochcheettes.

⁶ Istti am7etanne bete asata wodheettes; yi7ota siifeettes.

⁷ Histtidi isttas, «GODAY nuna be7enna; Yaaqoobe Xoossi akeekenna» geettes.

⁸ Intteno asaa giddofe dammatoo! Akeekite! Intteno eeyatoo! Awude intte eranee?

⁹ Hayth immida Xoossi siyennee? Ayfe medhdhida Xoossi be7ennee?

¹⁰ Kawoteththaa seerizayssi qaxxayennee? As erateth tamaarsizayssi baas erennee?

¹¹ GODAY asa qofay dhallonttayssanne hada gididayssa erees.

¹² Abeet GODAWU! Neni seerizaadeynne neni ne wogappe tamaarsiza asi anjjettidaade.

¹³ Iitati kundana ollay bookettana gakkanaas, ne iza metoppe shempisaasa.

¹⁴ GODAY ba asaa olenna; izi bayta aggenna.

¹⁵ Pirday simmidi xillo pirdas yoch gidana; xilloti ubbay tuma pirda kaallana.

¹⁶ Makkallanchchata bolla ta gishshas eqettanay oonee? Iita ooththizaytarakka ta gishshas mootettanay oonee?

¹⁷ GODAY tana maaddonttaakko, tani eeson duufon gelada sirphi gaana.

¹⁸ Abeet GODAWU! Tani, «Kundana hanays» gishin ne mernaa siiqoy tana kaafides.

¹⁹ Ta wozinay ceecen kumida wode ne minththeththoy ufays darsees.

²⁰ Wogan zemppidi geella pirdizaadera neni zuppetanaas dandayay?

²¹ Xillo asata bolla gene duulateettes; suure asata bollaka hayqo pirda pirdeettes.

²² GODAY gidikko taas tani baqata attiza miixa; ta Xoossi ta izan zemppiza wogga zaalla.

²³ Istta iitateththaa gishshas izi istta qaxxayana; istta nagara gishshas izi istta dhayssana; GODAA nu Xoossay istta dippi histtana.