ዬ ማጻፋ 92 - Geeshsha Maxaafa

Sambata Gallas Yexettiza Mazamure

¹ GODAA galatoy lo7o; Abeet Ubbaafe Dhoqqa Xoossawu! Ne sunththaas mazam-ure shiishoy lo7o.

² Maalado ne mernaa siiqo, giddoth ne ammaneteth awajjay lo7o.

³ Tammu shayan waaxettida bagananinne maasinqo diixxishe awajjay lo7o.

⁴ Abeet GODAWU! Ne ooththida wolqqama oosoti tana ufayssida; ne kushey ooththida gishshas tani ufayssan yexxays.

⁵ Abeet GODAWU! Ne oosoy ay keena gitaa! Ne qofaykka ay keena ciimmaa!

⁶ Hessa eeya asi eranawu dandayenna; damma asikka akeekanawu dandayenna.

⁷ Iitati maata mala diccikokka, gene ooththiza ubbati ciiykkoka istti mernaas dhayana.

⁸ Gido attiin abeet GODAWU! Neni mernaas ubbaafe dhoqqa.

⁹ Abeet GODAWU! Ne morkketi dhayana; iita ooththiza ubbati piski gaanayssa nu eroos.

¹⁰ Ta kaceza menththa kace mala dhoqqisadasa; lo7o zaytenkka tana tiyadasa.

¹¹ Ta morkketi xoonettidayssa ta ayfen be7adis; ta baalgaarata kundeth ta ayfen be7adis.

¹² Xilloti zamba mala daayana; qasse Libaanoose xiidda mala diccana.

¹³ Istti GODAA keeththan tokettida; istti Xoossa Keeththa zago gakkanaas daayana.

¹⁴ Istti ceeggidikka ayfana; istti ubba wode cililida malanne minnida mala daana.

¹⁵ Istti, «GODAY likke; izi taas wogga zaalla; iza bolla wosoy deenna» gaana.