ዬ ማጻፋ 90 - Geeshsha Maxaafa

Oydanththo Maxaafa ( Maza 90—106 ) Xoossa As Musey Woossida Woosa

¹ Godawu! Neni nuus yeletappe yeleta gakkanaas shiiqi attizaso gidadasa.

² Zumati medhettanaappe kase, woykko neni sa7a ooththanaappe kase mernaappe mernaa gakkanaasi neni Xoossa.

³ Neni asa nayta, «Asa naytoo! Guye biittan simmite» gaada istti medhettida biittan guye zaaraasa.

⁴ Shii layththi nees aadhdhida issi gallassa mala; woykko omarsafe issi saate mala.

⁵ As qoppontta efiza di7o mala ne efishin, istti agumo mala aadhdhana; maalado maalado mokkiza maata mala cilileettes.

⁶ Maatay maalado diccidi ciiyees; omarsa wode gidikko shullidi melees.

⁷ Nuni ne qanggeththan wuridos; ne hanqo suulen dagammidos.

⁸ Neni nu iita ooso ne sinththan woththadasa; qasse nu genththida nagara ne sinththa poo7okko aaththadasa.

⁹ Nu wode ubbay ne hanqon aadhdhides; nu layththaaka oolen wursoos.

¹⁰ Nu daana layththay laappun tamma; dares giikko osppun tamma; heytikka metoninne ceecen kumida; nu layththay eeson aadhdhees; nunikka eeson baana.

¹¹ Ne hanqoza wolqqa oonee erizay? ne hanqo seelay yashshees.

¹² Nu layththa maarara nu go7ettana mala nuna aadho erateth tamaarsa.

¹³ Abeet GODAWU! Ne hanqoy awude gakkana gam7anee? Simma! Ne aylletas qadhetta!

¹⁴ Nu layththa ubbaan nuni ufayettana malanne yexxana mala maalado maalado ne siiqon nuna kalssa.

¹⁵ Neni nuna metoththida gallassata keenanne nuni tugga be7ida layththata likke nuna ufayssa.

¹⁶ Nuus ne aylletas ne oosoy qoncco; ne bonchchoy nu naytas beetto.

¹⁷ Abeet GODAWU! Nu Xoossawu! Ne kiyateththi nunara gido; nu ooththiza ubbaa nuus injjesa; ero! Nu ooththiza ubbaa nuus injjesa.