ዬ ማጻፋ 9 - Geeshsha Maxaafa

Naa Hayqo Giigiso Geetettiza Yeththan Dawiti Zammareta Kaabbos Yexxida Mazamure

¹ Abeet GODAWU! Tani nena kumeththa wozinappe galatana; malalisiza ne oosoza ubbaaka ta yootana.

² Tani nenan ufayettananne hashshu gaana. Ubbaafe Dhoqqa Xoossawu! Tani ne sunththas galata mazamure yexxana.

³ Ne qoncciza wode ta morkketi guye simmana; ne sinththafekka dhuphetti dhayana.

⁴ Neni taas xillo pirda pirdadasa; neni xilloteththan pirdashe ne kawoteththa araatan uttadasa.

⁵ Neni kawoteththata seeradasa; iitatakka dhayssadasa; neni istta sunththaa meri mernaaskka qucca diggadasa.

⁶ Morkketi meri mernaas dhayda; istta katamatakka mulera dhoqalla dhayssadasa; istti mulera dogetti attida.

⁷ Gido attiin GODAY mernaas kawotidi dees; izi pirdanaas ba araata giigsides.

⁸ Izi ha alameza xilloteththan pirdana; kawoteththata bollaka tumateththan pirdana.

⁹ GODAY un7ettidaytas baqati attizaso; meto wodetankka qotetti attizaso.

¹⁰ Ne sunththa erizayti nenan ammanetteettes; ays giikko GODAWU! Neni nena koyzayta yegga aggabeekka.

¹¹ Xiyoonen kawoti uttida GODAAS galata mazamure yexxite; izi ooththida ooso dere ubbaas qonccen yootite.

¹² Ays giikko suuth gussizaytas halo kessiza Xoossi naaqettidayta waasoza izi dogenna.

¹³ Abeet GODAWU! ta morkketi tana yedeththizayssa be7a. Neni taas qadhettada hayqoppe tana ashsha.

¹⁴ Hessika tani Xiyoone asa karen eqqada nena galatanaassinne ne ashshidayssan keeha ufayettanaassa.

¹⁵ Kawoteththay ba bookkida ollan kundides. Istti qotti woththida woximadey istta toho oykkides.

¹⁶ GODAY ba xillo pirdan erettides; iita asi ba kushen ooththida ooso woximaden oykettides.

¹⁷ Iitati si7oolen gelana; Xoossa dogiza kawoteththay ubbayka istta mala hanana.

¹⁸ Hiyeesati aydekka dogetti attettenna; woykko manqota hidotay coo mernaas dhayenna.

¹⁹ Abeet GODAWU! Kawoteththati ba wolqqan dendidi ne bolla ceeqettontta mala neni istta bolla pirda.

²⁰ Abeet GODAWU! Ne istta daganththa; istti as gididayssa neni istta erisa.