ዬ ማጻፋ 89 - Geeshsha Maxaafa

Ezira7eele As Etaaney Hassa7a Ginxon Shiishshida Timirte

¹ Abeet GODAWU! Ne mernaa siiqo gishshas tani mernaas yexxana; ne ammaneteththaa yeleta ubbaas ta awajjana.

² Tani ne mernaa siiqoy mernaas eqqidayssanne neni ne ammaneteththaa salon minththada essidayssa yootana.

³ Neni, «Tani dooridayssara caaqo qaala geladis; ta aylle Dawites,

⁴ ‹Tani ne zareta mernaas kawosana; ne kawoteththa algaa yeleta ubbaas minththana› ga caaqqadis» gadasa.

⁵ Abeet GODAWU! Saloti neni ooththida malalisiza oosota awajjeettes; geeshshata duulatay ne ammaneteththaa sabbees.

⁶ Salon GODAARA likkettanaas dandayzay oonee? Salo medheteththata giddonkka GODAA malay oonee?

⁷ Geeshshata shiiqon Xoossi yashissizaade; Ba yuushon diza ubbaafe keehi yashissizaade.

⁸ Abeet GODAWU! Ubbaafe Wolqqama Xoossawu! Ne mala wolqqamay oonee? Abeet GODAWU! Neni ubbaa miishshan ammanettidaade.

⁹ Ne bul7akettiza abba seeraasa; abba dambalakka co7u ooththaasa.

¹⁰ Neni Era7aabe geetettiza abba do7aza qoxereththa wodhadasa; ne morkketa ne wolqqama qesen laalladasa.

¹¹ Saloti neyta; sa7aykka neessa; biittanne izan kumida ubbaa neni medhdhadasa.

¹² Pudehanne dugeha neni medhdhadasa; Taaboorenne Hermoone zumati ufayssan ne sunththan yexxeettes.

¹³ Nees wolqqama qesey dees; ne qesey mino; ne ushachcha qesey yashshees.

¹⁴ Xilloteththinne suure pirday ne kawoteththa araataas yochcha; maaroteththinne ammaneteththi neeppe sinththara beettes.

¹⁵ Abeet GODAWU! Ililisan nena sabbizaytinne ne poo7on hemettizayti anjjettidayta.

¹⁶ Ne sunththan kumeththa gallas ufayetteettes; ne xilloteththa gishshas istti nena dhoqqu dhoqqu histteettes.

¹⁷ Istti ceeqettiza wolqqay nena; ne teeman istta kacey dhoqqu dhoqqu gees.

¹⁸ Nu gondalley GODAA kushenna; nu kawoykka Isra7eele geeshsha kushenna.

¹⁹ Beni neni ne ammanettida asatas ajjuutan, «Tani ola qaraa maaddadis; deraa giddofe doorettida yelaga dhoqqu dhoqqu histtadis.

²⁰ Ta aylle Dawite demmadis; ta geeshsha zaytenkka tiyada iza kawoththadis.

²¹ Ta kushey iza maaddana; ta qeseykka iza minththana.

²² Iza ay morkkey haaridi giirisenna; ay iita asikka iza qohenna.

²³ Tani iza morkketa iza sinththan tinchchereththana; iza ixxizaytakka shoca nififi histtana.

²⁴ Ta ammaneteththaynne ta mernaa siiqoy izara issife gidana; Ta sunththan iza kacey dhoqqu dhoqqu gaana.

²⁵ Tani iza kawoteththa Mediteraane Abba gakkanaas aassana. Iza zawakka Efiraaxisenne Xegroose Shaafata gakkanaas aassana.

²⁶ Dawiti tana, ‹Neni ta aawaa; ta Xoossanne tana ashshiza wogga zaalla› gi xeygana.

²⁷ Tani iza taas bayra naa histtana; sa7an diza kawota ubbaafe ta iza gitasana.

²⁸ Tani ta siiqo izas mernaas naagana; tani izas gelida caaqo qaala minththana.

²⁹ Tani iza zareta mernaas minththa essana; iza kawoteththa araataakka salo mala mernaas minththa tokkana.

³⁰ «Gido attiin iza zereththati ta woga aggiko, qasse istti ta azazokka naagontta ixxiko,

³¹ istti ta woththida maara moorikko, ta azazokka bonchchontta ixxiko,

³² tani istta nagara gishshas istta guufen qaxxayana; istta mooro gishshas istta xurqafen shocana.

³³ Gido attiin tani ta siiqo izappe haassike; woykko ta ammaneteth izas pacinchchike.

³⁴ Tani caaqqida caaqo qaala miikke; ta doonappe ke7ida qaala laammike.

³⁵ Tani issito ta geeshsha sunththan caaqqida qaala Dawites wordotikke.

³⁶ Iza zareti mernaas minnidi daana; iza kawoteththa algayka awa arshe mala ta sinththan mernaas daana.

³⁷ Salo bolla ammanettida markka gidada diza agina mala izi mernaas minni daana» gadasa.

³⁸ Gido attiin ha7i neni tiyada kawoththidayssa bolla keeha hanqettadasa; iza kadhadasanne yegga aggadasa.

³⁹ Neni ne ayllezas caaqqida caaqo qaala laalladasa; iza kallachcha baanan olada tunisadasa.

⁴⁰ Neni katamaa gimbeza ubbaa laalladasa; iza miixa ubbaa dhayssadasa.

⁴¹ Ogera aadhdhiza ubbati iza bonqqida; izi ba shoorotas qidhes attides.

⁴² Neni iza morkketas ushachchadasa; istta ubbaa ufayssadasa.

⁴³ Neni iza mashsha qaraza dun7isadasa; olankka iza maaddabeekka.

⁴⁴ Neni iza kawoteththa guufaa iza kusheppe woththa ekkadasa; qasse iza kawoteththa araataa biittan oladasa.

⁴⁵ Neni iza yelagateththa layththaa qaanththadasa; yeellaka mayzadasa.

⁴⁶ Abeet GODAWU! Awude gakkanaas nena genththanee? Neni mernaas geemmanee? Ne hanqoy tama mala awude gakkanaas eexxanee?

⁴⁷ Ta layththay ay keena qaanththako qoppa; ne asa naa coo hada medhdhadii!

⁴⁸ Asi hayqqontta mernaas shemppora paxa daanaas dandayzee? Qasse duufon gelontta mala bana ashshanaas dandayza asi dizee?

⁴⁹ Abeet Godawu! Dawites ne ammaneteththan caaqqida caaqoynne kase ne mernaa siiqoy awan dizee?

⁵⁰ Abeet Godawu! Tani ne aylley ay mala borettidaakko neni haasaya; tani asa ubbaa boreza wostta dandaydaakko ane ne qoppa.

⁵¹ Abeet GODAWU! Ne morkketi ne doorada tiyda kawoza cayizayssa, izi bidaso ubbaan iza qilccizayssa qoppa.

⁵² GODAY meri mernaas galatetto! Amiin! Amiin.