ዬ ማጻፋ 88 - Geeshsha Maxaafa

Izra7eele as Emaaney soren shiishshida ginxo Qoore nayti zammareta kaabbos diiththa giigson yexxida mazamure

¹ Abeet GODAWU! tana ashshiza Xoossawu! Tani gallassinne omars ne sinththan yeekkays.

² Ta waasoy ne sinththi gakko; ne hayth ta woosakko zaara.

³ Ays giikko ta de7oy meton kumides; tani hayqqana matadis.

⁴ Tani duufon geliza asatara qoodettadis; wolqqay baynda as gidadis.

⁵ Tani ahata giddon olettida asa mala, hayqqidi duufon moogettida aha mala, tani ubbaaka neni dogida asa malanne ne maadoppe duuxxida asa mala gidadis.

⁶ Neni tana ciimma ollan, duge dhuma sohon yeggadasa.

⁷ Ne hanqoy tana deexxees; ne hanqoza dambalay tana mulera mittides.

⁸ Neni ta laggeta taappe haassadasa; istti tana shuunettana mala ooththadasa; tana giddoththida; kessa ekkanawukka dandaykke.

⁹ Abeet GODAWU! Kayo gaason ta ayfeti doljumida; Ubbaa gallas tani neekko waassays; ta kushetakka neekko miccays.

¹⁰ Neni hayqqidaytas malalisiza miish ooththay? Istti dendidi nena galatanee?

¹¹ Ne mernaa siiqoy duufon ne ammaneteththayka bashshason yootettizee?

¹² Ne malalisiza oosoy dhuman erettizee? Woykko ne xilloteththay dogettida asata biittan beettanee?

¹³ Abeet GODAWU! Neni tana maaddana mala ta neekko waassays; maalado maalado ta woosay ne sinth gakko.

¹⁴ Abeet GODAWU! Neni tana ays ixxay? Ne sinththaa taappe ays genththay?

¹⁵ Yelagateththasofe doommada, tani tuggatadissinne hayqqana matadis; neni tana daganththiin hidota qanxxadis.

¹⁶ Suulliza ne hanqoy ta bolla gakkides; babisiza ne hanqoy tana dhayssides.

¹⁷ Istti kumeththa gallas di7o haaththa mala tana giddoththida; issi bolla gididi tana dooddi oykkida.

¹⁸ Neni ta laggetanne ta siiqota taappe haassadasa; dhumay xalla taas dabbo gidides.