ዬ ማጻፋ 86 - Geeshsha Maxaafa

Dawite Woosa

¹ Abeet GODAWU! Tani hiyeesanne metotanchcha gidida gishshas ta waasoza siyada taas zaaro imma.

² Tani nees dumma as gidida gishshas ne ta shemppo naaga; neni ta Xoossa; nenan ammanettiza ne aylleza tana ashsha.

³ Abeet Godawu! Kumeththa gallas ta neekko waassiza gishshas ne tana maara.

⁴ Abeet Godawu! Tani wozinappe nena woossiza gishshas tana ne aylleza ufayssa.

⁵ Abeet Godawu! Neni nuus kiyanne atto gizaade; nena woossiza ubbaas ne mernaa siiqo bessaasa.

⁶ Abeet GODAWU! Ta woosa siya; ta shoobba woossizayssa ezga.

⁷ Ne taas zaaro immiza gishshas tani meto gallassan neekko waassays.

⁸ Abeet Godawu! Ne malay xoossata giddon baawa; ne oosora ginattiza oosoykka deenna.

⁹ Abeet Godawu! Neni medhdhida kawoteththay ubbay neekko yiidi nees goynnana; ne sunththaaka bonchchana.

¹⁰ Neni gita; malalisiza miish ooththaasa. Neni xalla Xoossa.

¹¹ Abeet GODAWU! Tani ne tuman baana mala tana ne oge tamaarsa; tani ne sunththas yayyana mala taas issi wozina imma.

¹² Abeet Godaa ta Xoossawu! Tani nena ta kumeththa wozinappe galatana; Ne sunththaaka mernaas bonchchana.

¹³ Ays giikko ne tana bessida mernaa siiqoy keehi gita; neni ta shemppoyo duufoppe ashshadasa.

¹⁴ Abeet Xoossawu! Otoranchchati ta bolla dendida; tana wodhana koyidi pangati duulateettes; nena wudankka yeggibeettenna.

¹⁵ Gido attiin abeet Godawu! Neni qadhettizaadenne maariza Xoossa; hanqettanaas gam7iza Xoossa; ne siiqoynne ne ammaneteththay keehi daro.

¹⁶ Taakko simmada taas qadhetta; taas ne ayllezas wolqqa imma; ne aylley naaza tana ashsha.

¹⁷ Abeet GODAWU! ne tana maaddizayssanne minththeththizayssa tana ixxizayti be7idi yeellatana mala ne kiyateththa malata tana bessa.