ዬ ማጻፋ 85 - Geeshsha Maxaafa

Qoore Nayti Zammareta Kaabbos Diiththan Yexxida Mazamure

¹ Abeet GODAWU! Neni ne biittas kiyateth bessadasa; Yaaqoobe di7ettidasoppe zaaradasa.

² Neni ne asaa naaqo atto gadasa; istta nagara ubbaa kammadasa.

³ Neni yiillotizayssa ubbaa aggadasa; suulliza ne hanqofekka simmadasa.

⁴ Abeet nuna ashshiza Xoossawu! Ne nuna zaara; Neni nu bolla lanccettidayssa agga.

⁵ Neni nuna mernaas hanqettanee? Ne hanqoy yeletappe yeleta gakkanawu gam7anee?

⁶ Ne asay nenan ufayettana mala, ne nuna ooraxissikii!

⁷ Abeet GODAWU! Ne mernaa siiqoza nuna bessa; neni nuna ashsha.

⁸ Tani GODAA Xoossi yootizayssa siyana; istti simmidi bala ogen bontta aggiko, ba geeshsha deraas Saroteth ehanaas hidota immides.

⁹ Iza bonchchoy nu biittan daana mala atoteththay izas yayyizaytas matan dees.

¹⁰ Siiqoynne tumateththi issife sigetteettes; Xilloteththinne saroteththi issife idimetteettes.

¹¹ Ammaneteththi sa7appe pude kezana; Xoossa Xilloteththi saloppe duge wodhdhana.

¹² Be7ite! GODAY lo7o miish immana; nu biittayka lo7o kath mokisana.

¹³ Xilloteththi izappe sinththara baana; izi baanaasokka izas giigsana.