ዬ ማጻፋ 84 - Geeshsha Maxaafa

Qoore Nayti Zammareta Kaabbos Susul7en Yexxida Mazamure

¹ Abeet medheteththa GODAWU! neni de7izasoy ay mala lo7osoo!

² Tani GODAA Keeththa zago laamotays; tani kumeththa wozinappe de7o Xoossas ufayssan yexxays.

³ Abeet Ubbaafe Wolqqama GODAWU! Ta kawozo Xoossawu! Nees yarsho yarshizasoza matan siine kafoy baas de7izaso demmadus. Haraphpheyakka baas yelizaso keexxadus.

⁴ Ne Keeththan de7izaytinne mernaas nena sabbizayti anjjettidayta.

⁵ Banttas nena wolqqa ooththizayti, Xiyoone oge ba wozinan amottizayti anjjettidayta.

⁶ Bakka geetettiza haaththi baynda shaafara istti kanththiza wode he sohon pulttoy dhuuqqana; Badhdhesa iraykka bukkidi biitta kalssana.

⁷ Istti wolqqa bolla wolqqa gujji gujji baana; Istti Xoossa sinththan Xiyoonen beettana.

⁸ Abeet Ubbaafe Wolqqama GODAWU! Ta woosa neni siya. Abeet Yaaqoobe Xoossawu! Ta gizaaz ezga.

⁹ Abeet Xoossawu! Neni doora tiyda nu kawoza anjja; izi nuus gondalle gidida gishshas ne iza xeella.

¹⁰ Harason shii gallas de7anaappe Xoossa Keeththan issi gallas duussi lo7o; Iitata dunkaanen daanaappe Xoossa Keeththa zagon zabe gideththi taas lo7o.

¹¹ GODAY nuus arshenne gondalle; izi ayoteththaninne bonchchon nuna naagees; Suureteththan hemettizayta izi lo7o miish diggenna.

¹² Abeet Ubbaafe Wolqqama GODAWU! Nenan ammanettizayti anjjettidayta.