ዬ ማጻፋ 82 - Geeshsha Maxaafa

Aasaafe Mazamure

¹ Xoossi salon diza duulata kaaleththees; xoossati ubbay shiiqiin istta bolla pirdishe,

² «Intte awude gakkanawu geella pirda pirdanee? Iitatakka awude gakkanaas maaddanee?

³ Wolqqay bayndaytassinne yi7otas tuma pirda pirdite; manqonne naaqettida asata maata naagissite.

⁴ Daaburanchchatanne metotanchchata ashshite; iitata kusheppeka istta woththi ekkite.

⁵ «Inttes aykko erateththinne akeekay deenna; intte dhuman simeretteeta; biitta yochchati ubbay qaaxxeettes.

⁶ «Tani inttena, ‹Intte xoossata; intte ubbayka Ubbaafe Dhoqqa Xoossa nayta› gadis.

⁷ ‹Gido attiin intte asi hayqqiza mala hayqqana; Qasse hara halaqati kundiza mala intteka kundana› gays» gees.

⁸ Abeet Xoossawu! Denda! Sa7a bolla pirda; kawoteththi ubbay neessa.