ዬ ማጻፋ 81 - Geeshsha Maxaafa

Aasaafey zammareta kaabbos susul7en yexxida mazamure

¹ Nuus wolqqa gidida Xoossas ufayssan yexxite; Yaaqoobe Xoossas ililite!

² Yeth doommite; karabe baqqite; diiththaninne maasinqon lo7o mazamure yexxite.

³ Aginay xeeriza wodenne dhuman geliza wode ba7aales zaye punnite.

⁴ Hayssi Isra7eeles woga; Yaaqoobe Xoossay immida azazo.

⁵ Gibxe biitta izi yeddi kezida wode Yooseefe zaretas woga histti woththides; tani erontta qaalara izi taas,

⁶ «Intte hasheppe tooho woththadis; intte kushe deexo gooshoppe shempisadis.

⁷ Intte meto wode tana xeygideta; histtiin tani inttena ashshadis; tani shaara giddora dadan inttena alladis; Mariiba geetettiza pultto haaththa matan tani inttena paaccadis.

⁸ «Ta derezoo! Tani nena seerizayssa siya! Isra7eele asawu! Ne tana ezga siyidaakko aazee dizay!

⁹ Intte giddon allaga xoossi dooppo; hara xoossas goynnofte.

¹⁰ Tani GODAA intte Xoossaa; inttena Gibxe biittafe kessada ehiday tana intte GODAA; ne doona keeha hanga; tani nena tuththana.

¹¹ «Gido attiin ta asati ta qaala siyibeettenna; Isra7eeleti taas kushe immibeettenna.

¹² Hessa gishshas tani istti ba wozina muumeteththaaththo ba dosoyssa hanana mala aggaagadis.

¹³ «Ta derey tana siyidaakkoo! Isra7eele asay ta oge kaallidaakko!

¹⁴ Tani istta morkketa isttas gulbatissana; istta baaligaaratakka ta shocanakkoshin.

¹⁵ GODAA ixxizayti iza sinththan kundana; istti mernaas qaxxayettana.

¹⁶ Gido attiin tani inttena muuruta gistte mizana; qasse zaallaafe inttena ees kalssana» gishin siyadis.