ዬ ማጻፋ 80 - Geeshsha Maxaafa

Zammareta kaabbos «Ciishsha» geetettiza diiththa giigson markkateththas yexettida Aasaafe mazamure

¹ Abeet Isra7eele heenththanchchawu! Yooseefe nayta wude mala kaaleththizayssoo! Neni nu woosa siya; Kirubeta bollara diza araatan uttidayssoo! Ne poo7on qoncca.

² Efreeme, Biniyaamenne Minaase sinththan qoncca beetta; Ne wolqqa denththada yaada nuna ashsha.

³ Abeet Xoossawu! Nuna zaara; nuni attana mala ne ayfeso nuus poo7isa.

⁴ Abeet GODAWU Ubbaafe Wolqqama Xoossawu! Ne asaa woosa bolla awude gakkanaas ne hanqettanee?

⁵ Neni istta yeeho quma mala mizadasa; qasse afunththa haaththa mala ushshadasa.

⁶ Nu shooroti nu biitta ekkanaas bantta giddon ooyettana mala ooththadasa; nu morkketikka nu bolla miiccida.

⁷ Abeet Ubbaafe Wolqqama Xoossawu! Nuna zaara; nuni attana mala ne ayfeso nuus poo7isa.

⁸ Neni Gibxeppe woyne ano ehadasa; kawoteththata yedeththada istta biittan izo tokkadasa.

⁹ Neni izis biittaa qeexa giigsadasa; histtiin xapho yeddada biitta ubbaa gakkadus.

¹⁰ Zumati izi kuwan, Libaanoose zigati izi haggatan kamettida.

¹¹ Ba haggata Mediteraane Abba gakkanaas qasse ba xeerata Efiraaxise Shaafa gakkanaas yeddadus.

¹² Histtiin ogera aadhdhiza ubbay izi ayfe duuththi maana mala izi yuushozan diza gimbeza ays laalladii?

¹³ Bazzo guddunththi izi bolla duri kaa7ees; qasse wora do7ati ubbay izo meettes.

¹⁴ Abeet Ubbaafe Wolqqama Xoossawu! Neni nuukko simma; salora duge xeellada nuna be7a; hanno woyne miththayo naaga.

¹⁵ Iza ne ushachcha kushey tokkida puute; neni nees gaada dichchida aaca.

¹⁶ Morkketi ne woyne qeexidi taman xuuggida; hessa gishshas neni istta ne hanqoza suulen dhayssa.

¹⁷ Ne kushey ne ushachcha baggara diza asaa neni nees dichchida asa naago.

¹⁸ Hayssafe guye nuni nena aggidi guye simmoko; nuna shemppora paxa woththa; nunikka nena galatana.

¹⁹ Abeet Ubbaafe Wolqqama Xoossawu! Nuna zaara; nuni attana mala ne ayfeso nuus poo7isa.