ዬ ማጻፋ 79 - Geeshsha Maxaafa

Aasaafe Mazamure

¹ Abeet Xoossawu! Kawoteththati ne biitta worajjida; geeshsha gidida Xoossa Keeththa tunisida; Yerusalaame laalli yeggida.

² Istti ne aylleta aha salo kafotas quma ooththidi immida; qasse ne geeshsha asata asho sa7a do7atas immida.

³ Istta suuth Yerusalaame yuushon haaththa mala gussida; istta aha moogiza asi dhaydes.

⁴ Nu shoorotas nuni qilccas gididos; nu heeran dizaytas qidhessinne miichchas attidos.

⁵ Abeet GODAWU! Hayssi awude gakkanaas hananee? Neni mernaas hanqettanee? Ne qanaatey tama mala eexxishe de7anee?

⁶ Nena erontta dereta bollanne ne sunththa xeygontta kawoteththata bolla ne hanqoza gussa.

⁷ Ays giikko istti Yaaqoobe zereththata wodhidanne istti de7izasozikka mulera dhayssida.

⁸ Kase nu aawata nagara nu bolla qoodoppa; eeson ne maarotaa nuus kiitta; ays giikko nuni keehippe metotidos.

⁹ Abeet nuna ashshiza Xoossawu! Ne sunththa bonchcho gishshas nuna maadda; ne sunththa gishshas nuna ashsha; nu nagarakka atto ga.

¹⁰ Kawoteththati, Ays «Istta Xoossi awan dizee?» gaanee? Ne aylleta suuth istti gussidayssa neni halo kessizayssa nu ayfey be7ishin kawoteththata erisa.

¹¹ Qasho asata ooley ne sinth gakko; Hayqos pirdettidayta ne mino qesen ashsha.

¹² Abeet Godawu! Nu shooroti nena qidhidayssa halo laappun kushe isttas zaara.

¹³ He wode nuni ne deretinne nees wude dorsati mernaas galata nees immana; yeletappe yeleta gakkanaas neni nuus ooththida oosoza nu yootana.