ዬ ማጻፋ 78 - Geeshsha Maxaafa

Aasaafey Hassa7an Shiishshida Ginxo

¹ Ta derezoo ta nena tamaarsizayssa siya; ta doonappe ke7iza qaala ezga.

² Tani haasayza haasaya leemison doommays; beniisofe qotan diza xuura yo7o qonccisays.

³ Nu siyidayssinne nu eridayssi, nu aawatikka nuus yootidayssa.

⁴ He yo7ota nuni istta naytappe qottoko; GODAAS bessiza galata, iza wolqqanne malalisiza iza ooso yiza yeletataskka nuni yootana.

⁵ Izi Yaaqoobe zaretas azazo, Isra7eele asaas woga immides; kase nu aawati bantta nayta he wogata tamaarsana mala azazides.

⁶ Hessika kaalliza yeletay istta eranaassa; qasseka buro yelettana nayti eranaassanne isttika bantta naytas yootanaassa.

⁷ He naytikka Xoossan ammanettana; izi ooththida oosokka dogettenna; iza azazotakka istti naagana.

⁸ Istti kase bantta aawata mala wozina muumenne makkallanchcha gidettenna; istti Xoossa sinththan suure gidettenna; Xoossaska ammanettibeettenna.

⁹ Efreeme nayti olas wondafenne yiish giigsi kezida; gido attiin ola gallas guye simmida.

¹⁰ Istti Xoossa caaqo qaala naagibeettenna; iza wogaa mala dontta ixxida.

¹¹ Istti izi ooththida ooso balida; izi istti bessida malalisiza hanotakka dogida.

¹² Izi istta aawati be7ishin Gibxe biittan Xaanoose demban malaata ooththides.

¹³ Abba shaakkidi giddora istta pinththides; izi haaththa yaanne haa shaakkidi goda mala essides.

¹⁴ Izi istta gallas shaaran, omars tama poo7on kaaleththides.

¹⁵ Izi bazzon zaalla phalqidi abba mala daro haath istta ushshides.

¹⁶ Zaallafe haath pulttisidi shaafa mala duge gogissides.

¹⁷ Gido attiin istti iza bolla nagara ooso gede gujjida; Ubbaafe Dhoqqa Xoossa bolla bazzon makkallida.

¹⁸ Istti keehi amottida kath oychchida; erishe ba wozinan Xoossa paaccida.

¹⁹ Istti Xoossa bolla, «Bazzon Xoossi nuus maana kath immana dandayzee?

²⁰ Zaallaa shociin pulttoy ke7idi shaafa haaththi goggides; histtiin izi nuus miza kath immanawu dandayzee? Woykko ba asaas asho immanawu dandayzee?» gi haasayda.

²¹ GODAY hessa siyida wode istta bolla daro hanqettides; Yaaqoobe zareta bolla tamay eexxides; Isra7eele bolla iza hanqoy dari dari bides.

²² Ays giikko istti Xoossan ammanibeettenna; izi ashshizayssaka ammanettibeettenna.

²³ Izi gidikko bollafe shaara azazides; salo pengetakka doydes.

²⁴ Istti maana mala isttas manna bukisides; saloppe kath isttas immides.

²⁵ Kiitanchchata kath asay mides; Xoossi istti kalli miin tirpi attiza kath immides.

²⁶ Arshey mokkiza baggara saloppe carkoy carkana mala ooththides; ba wolqqan dugeha bagga carko denththeththides.

²⁷ Izi asaas asho gudulla biitta mala, abba doonan diza ace mala daro piradhdhiza kafota yeddides.

²⁸ Istti dunkaani uttidaso dunkaanaa yuushon wodhdhida.

²⁹ Istti amottidayssa isttas immides; isttika kalli mida.

³⁰ Gido attiin istti ba moosaa aaththontta buro muussa bolla de7ishin,

³¹ Xoossa hanqoy istta bolla wodhdhides; istta giddofe mino asata wodhides; Isra7eeleppe payya naateththata mulqqides.

³² Hayssi ubbay haniinkka istti nagara ooththizayssa aggibeettenna; malalisiza iza oosotakka be7idi ammanibeettenna.

³³ Hessa gishshas izi istta layththata peeno mala aaththides; istti diza wodeta hirgan wursides.

³⁴ Xoossi isttafe guuththata wodhiin attidayti ba nagara paaxida; wozinappe koyishe Xoossako simmida.

³⁵ Istti Xoossi isttas Zaalla gididayssanne Ubbaafe Dhoqqa Xoossi istta wozzidayssa hassa7ida.

³⁶ Gido attiin istti bantta inxarsan izas wordotidi bantta doonan cimmida.

³⁷ Istta wozinay Xoossan minni eqqibeenna; izi isttara caaqettida caaqon ammanettibeettenna.

³⁸ Gido attiin izi istta maarizaade gidida gishshas istta iitateththaa atto gides; isttaka dhayssibeenna; daro wode ba hanqoza istta bollafe teqqides; ba hanqoza bosha ubbaa istta bolla yeddibeenna.

³⁹ Issino carki aadhdhidaappe guye simmontta carko mala asho may7ida as gididayssa akeekides.

⁴⁰ Istti bazzon aappunto iza bolla makkallidoo! Mela bazzon aappunto iza lancissidoo!

⁴¹ Istti zaari zaaridi Xoossa paaccida; Isra7eele Geeshshaa madunththida.

⁴² Izi istta morkketappe wozzida gallassatanne iza wolqqaa dogida.

⁴³ Izi Gibxe biittan malaata, Xaanoose demban malalisizaaz ooththidayssa qoppibeettenna.

⁴⁴ Istta shaafa haaththa suuththan laammides; hessa gishshas Gibxe asati he shaafatappe uyanaas dandaybeettenna.

⁴⁵ Istta olanaas udunxxetanne istta biitta dhayssanaas shodhdheta kiittides.

⁴⁶ Isttas mokkida kaththa gumbaros; istti ooththi daaburda kaththaa booles immides.

⁴⁷ Istta woyne tura shachchan, istta balase miththatakka kenchchon dhayssides.

⁴⁸ Istta miizata shachchan wodhides; istta meheta wolqqanththan xuuggi wursides.

⁴⁹ Ba mino hanqo, bosha, bashshinne dhayssiza kiitanchchatan istta bolla yeddides.

⁵⁰ Ba hanqozas oge giigsides; istta iita harges aaththi immides; gido attiin hayqoppe ashshibeenna.

⁵¹ Gibxen yelettida bayra nayta ubbaa wodhides; Kaame dunkaanen koyro yelettida nayta wursides.

⁵² Gido attiin izi ba asaa dorsa mala kessi heemmides; wude mala bazzon kaaleththides.

⁵³ Izi istta saron kaaleththides; isttika hirgibeettenna; istta morkketa gidikko abbay mittides.

⁵⁴ Histtidi ba geeshsha biitta, ba ushachcha kushen xooni oykkida zuma efides.

⁵⁵ Izi istta sinththafe kawoteththaa gooddidi istta biitta Isra7eele zaretas gishereththi immidi istta laatissides; Isra7eele asaa istta morkketa keeththan woththides.

⁵⁶ Istti gidikko Ubbaafe Dhoqqa Xoossa bolla makkallida; iza paaccidi iza wogatakka naagontta ixxida.

⁵⁷ Istti beni bantta aawata mala makkallanchchatanne kaddizayta gidida; ammanththontta bokka tooman eqqida toora mala gidida.

⁵⁸ Istti goynniza dhoqqasohotan iza yiillochchida; bantta eeqa xoossatan iza qanaatissida.

⁵⁹ Histtiin Xoossi hessa siyidi keehi hanqettides; Isra7eele mulera yeggi aggaagides.

⁶⁰ Asaa giddon izi tokkida dunkaana Seelon ba dizasoza yeggi aggides.

⁶¹ Xoossa wolqqassinne bonchchos malaata gidida Taabotaa morkketa kushen aaththi immides.

⁶² Izi ba deraa bolla hanqettides; istta giththa mashshas aaththi immides.

⁶³ Istta panththata tamay mides; histtiin istta geela7oti azina gelontta attida.

⁶⁴ Istta qeeseti mashshan wurida; istta machchetikka yeekkanaas dandaybeettenna.

⁶⁵ Hessafe guye Goday dhiskofe beeggiza mala beeggides; woykko woyne ushshu uyi maththottida qaray maththofe beeggiza mala dendides.

⁶⁶ Izi ba morkketa shocidi guye zaarides; istti mernaas yeellatana mala ooththides.

⁶⁷ Yooseefe dunkaane kadhides; Efreeme qommota dooribeenna.

⁶⁸ Gido attiin izi Yuhuda zarenne ba siiqiza Xiyoone zumaa doorides.

⁶⁹ Hessan izi Xoossa Keeththaa salo kessi dhoqqan keexxides; sa7a mala mernaas essides.

⁷⁰ Ba aylle Dawite dooridi dorsa wude heemmizasohoppe ekkides.

⁷¹ Iza dorsata heemmizasohoppe kessidi ba dere Yaaqoobenne ba xinxxo Isra7eele heenththanchcha ooththides.

⁷² Histtiin Dawitikka istta suure wozinan heemmides; qasseka hiillan istta kaaleththides.