ዬ ማጻፋ 77 - Geeshsha Maxaafa

Aasaafey Zammareta Kaabbo Edotaanes Yexxida Mazamure

¹ Tani ta qaala dhoqqu histtada Xoossako waassays; tana siyana mala ta iza woossays.

² Tani metotida gallas Xoossa koyays; omarsika shempontta ta kusheta izakko miccays; gidikkoka tani minettanaas dandayabeekke.

³ Abeet Xoossawu! Ta nena qoppashe ceecays; ta yuushsha qoppashe keeha daaburdes.

⁴ Ta ayfeppe dhisko dhayssadasa; taas gaanaazi dhayana gakkanaas ceecadis.

⁵ Tani aadhdhida wodeta qoppadis; kase aadhdhida layththatakka hassa7adis.

⁶ Ta yexxidayssa giddoth yuushsha qoppadis; tani wozinan akeekadis; ta ayanay tana denththeththiin,

⁷ «Goday nuna mernaas yeggi agganee? Hayssafe guye nuna lo7o bessennee?

⁸ Nuna siiqizayssa mulera aggidee? izi yootida hidotay shaarettidee?

⁹ Xoossi ba maarizayssa aggidee? Hanqon ba qadheta aggidee?» ga oychchays.

¹⁰ Ubbaafe Dhoqqa Xoossawu! Tana qohiday, ne ushachcha kushey kaseyssaththo nuna maaddontta aggoyssa.

¹¹ GODAWU! Ne oosota tani qoppana; neni beni wode ooththida malalisiza oosota ubbaa ta yuushsha qoppana.

¹² Ne ooththida ubbaa tani zaara zaarada qoppana; ne wolqqama oosota ubbaa tani akeekana.

¹³ Abeet Xoossawu! Ne ogey geeshsha; nu Xoossaa mala hara gita xoossi oonee?

¹⁴ Neni malalisizaaz ooththiza Xoossa; dereta giddon ne wolqqa bessaasa.

¹⁵ Yaaqoobenne Yooseefe zereth gidida ne dereta neni ne wolqqan wozzadasa.

¹⁶ Abeet Xoossawu! Haaththati nena be7ida; Haaththati nena be7idi yayyida; ciimma abbatikka kokkorida.

¹⁷ Shaarati ira immida; salon daday guummides; wolqqanththi wawaci gides.

¹⁸ Ne dada gunththay gote carko giddon kooshimides; ne wolqqanththa phoolleththi sa7a poo7isides; biittayka qaaxxi kokkorides.

¹⁹ Neni abba giddora hemettaasa; ciimma abba giddora kanththaasa; gidikkoka ne bida geedoy erettenna.

²⁰ Musenne Aaroone kushen neni ne dereza dorsa wude mala kaaleththadasa.