ዬ ማጻፋ 76 - Geeshsha Maxaafa

Aasaafey Zammareta Kaabbos Diiththatan Yexxida Mazamure

¹ Xoossi Yuhudan erettides; iza sunththika Isra7eelen gita.

² Iza dunkaaney Saleemen dees; izas duussasoyka Xiyoone.

³ Izi hessan dukkiza wondafe yiishshaa, gondalle, giththa mashshatanne hara ola miishshata menththereththi yeggides.

⁴ Abeet Xoossawu! Neni bonchcho may7ada phoollaasa; Ne teemateththi gita zumatappeka aadhdhees.

⁵ Gooba olanchchati bonqqettida; isttafe issoyka ba kushe denththana dandaybeenna; istti wolqqama dhisko dhiskida.

⁶ Abeet Yaaqoobe Xoossawu! Ne hanqo gaason toga asatinne toga parati kundi attida.

⁷ Abeet Xoossawu! Neni yashshaasa! Ne hanqoy suullida wode ne sinththan oonee eqqanay?

⁸ Neni saloppe pirda sissadasa; biittay yayyada sirphi gadus.

⁹ Abeet Xoossawu! Hayssi sa7a bolla un7ettidayta ashshanaas neni pirdas dendiin handes.

¹⁰ Neni as hanqikokka hessi ne bonchchos gidees; olappe attidayti ne ba7aale bonchchana.

¹¹ GODAA intte Xoossaas adinite; he adinettidayssaka gaththite; iza yuushon diza ubbati yashissiza izas imota ekki yiite.

¹² Izi otorettiza daannata kawushshana; wolqqama kawotakka izi yashissana.