ዬ ማጻፋ 75 - Geeshsha Maxaafa

Aasaafey zammareta kaabbos, «Dhayssofa» geetettiza diiththa giigson shiishshida mazamure

¹ Abeet Xoossawu! Nena galatoos; ne nuus mata gidida gishshas ne sunththas galata shiishshoos; asaykka malalisiza ne ooso ubbaa gishshas haasayees.

² Xoossi, «Ta bara woththida woden suure pirda pirdanay tana.

³ Sa7aynne iza bolla diza medheta ubbay qaaxxiza wode sa7a tuussata minththa essiday tana.

⁴ Otoranchchata, ‹Otorettofte› gays; iitatakka, ‹Intte makkallofte.

⁵ Ne kace otoron dhoqqu dhoqqu histtofa; ne qoodhe qaaththa haasayoppa› gays» gees.

⁶ Bonchchoy arshey mokkizasoppe woykko wullizasoppe woykko bazzofe yeenna.

⁷ Gido attiin suure pirdizay Xoossa; izi issaa bolla pirdees; issaa xillisees.

⁸ GODAA kushen wancay dees; izan hoommotiza hanqo woyne ushshi kumi uttides; he ushshaza gede kare gussides; sa7an diza makkallanchchati hessa uyida; istti orccoka ashshontta congorsida.

⁹ Tani gidikko hayssa mernaas awajjana; Yaaqoobe Xoossaka mazamuren sabbana.

¹⁰ Tani iitata kace ubbaa menththana; xillota kace gidikko dhoqqu dhoqqu histtana.