ዬ ማጻፋ 74 - Geeshsha Maxaafa

Asaafi Hassa7an Shiishshida Ginxo

¹ Abeet Xoossawu! Neni nuna mernaas ays yegga aggadii? Heenththasohon diza dorsata bolla ne hanqoy ays suullidee?

² Beni neni doorida ne deraa nees buzo histta wozzida zareta hassa7a; neni de7ida Xiyoone Zuma qoppa.

³ Ane laalettida Xoossa Keeththaza yuuya xeella; Morkketi izan diza ubbaa miish dhayssida.

⁴ Ne morkketi ne soon, «Nuni xoonidos» giidi gerereettes. Xoono malata giidi bantta bandira essida.

⁵ Istti wora giddon mith qanxxanawu bantta kaltta dhoqqu histti oykkida as misatida.

⁶ Hiillanchchati ooththida alleqota kalttaninne madooshan menththereththi yeggida.

⁷ Xoossa Keeththaa taman xuuggidi dhayssida; ne xeygettizasoza tunisida.

⁸ Istti bantta wozinan, «Istta nuni mulera un7eththana» giidi qoppida; Deraan Xoossi goynettizasohota ubbaa taman xuuggida.

⁹ Nu shaakki eranaas malatay deenna; hayssafe guye nabey dendenna; Hayssi awude gakkanawu hananaakko eriza asi nu giddon deenna.

¹⁰ Abeet Xoossawu! Ne morkketi awude gakkanawu ne bolla qilccanee? Istti ne sunththa mernaas kadhishe daanee?

¹¹ Ne kusheza miccada ays istta dhayssikii? Ne ushachcha kusheza ays shophpha garsan lokkoma uttadii?

¹² Abeet Xoossawu! Benippeka ta kawoy nena; neni biitta bolla atoteth ehadasa.

¹³ Ne gita wolqqan abba shaakkadasa; iza giddon diza miimintteta hu7e qoo7ereththadasa.

¹⁴ Lewataane geetettiza miimintte hu7eta dinccadasa; iza asho bazzon diza medhetatas quma ooththa immaasa.

¹⁵ Neni pulttotanne kanchcheta doya yeddadasa; ubba wode goggiza shaafata qasse melissadasa.

¹⁶ Gallassay neessa; qammayka neessa; qasse arshenne agina istti dizason minththa woththiday nena.

¹⁷ Biittas zawa woththiday, balgonne bone medhdhiday nena.

¹⁸ Abeet GODAWU! Ne morkketi ne bolla wostti qilccidaakko, qasse eeya asati ne sunththaa wostti kadhidaakko qoppa.

¹⁹ Nees haarettizayta shemppo wora do7atas aaththa immofa; metotida ne deraa mernaas dogoppa.

²⁰ Biittan diza dhuma sohoti ubbay makkallanchchatan kumida gishshas neni nuus caaqqida caaqo qaala qoppa.

²¹ Naaqettidayti yeellati simmofetto; manqotinne metotidayti ne sunththa galatetto.

²² Abeet Xoossawu! Denda! Neni ne sunththas mootetta; eeyati gallas ubbaan nena kadhizayssa qoppa.

²³ Ne morkketi ne bolla waassiza waasoza, nena ixxizayti ne bolla ceeqettiza ceeqeteththaanne istta wocama dogoppa.