ዬ ማጻፋ 73 - Geeshsha Maxaafa

Heedzdzanththo Maxaafa ( Maza 73—89 ) Aasaafe Mazamure

¹ Wozina geesh gidida Isra7eele asaas Xoossi ay mala kiya!

² Gido attiin ta tohoy dhuphettiin ta kundaychchada guuththason attadis.

³ Ays giikko iita asatanne makkallanchchata dureteththaa be7ada tanikka istta mala hananaas amottadis.

⁴ Isttas tuggay deenna; istta asateththay payyanne mino.

⁵ Istti hara asay tuggatiza mala tuggatettenna; hara asa malakka metoti erettenna.

⁶ Hessa gishshas istti otoreteth alleqo mala qoodhen aaththeettes; makkallateth afala mala may7eettes.

⁷ Istta wozinappe iita qofay pulttees; bantta ayfe kessi dereqeettes.

⁸ Istti qidheettessinne iita haasayeettes; istti bantta otoron harata un7eththanawu mandeettes.

⁹ Istti salon diza Xoossaa bantta doonan cayeettes; Sa7an de7iza asaa bantta inxarsan dukkeettes.

¹⁰ Hessa gishshas dere ubbay isttako goochchees; istti yootizayssaka ubbaa eeson ammaneettes.

¹¹ Istti, «Xoossi ay erizee? Ubbaafe Dhoqqa Xoossas erateththi dizee?» geettes.

¹² Hekko iitati hayssa misateettes; istti ubbato wudu gonttayta; dureteththi qoodhe gakkidayta.

¹³ Histtiin tani wozina geeshshateththan naagidayssi tana ay maaddidee! Ta kushe ta xilloteththan meeccidayssi coo tana dhallibeenna.

¹⁴ Gallas kumeth tani meto beyadis; wontiin wontiin tani qaxxayettadis.

¹⁵ Tani istti haasayzayssa mala haasayana qoppidaakko ne deraas ta ammanettontta as gidana.

¹⁶ Tani ha yo7oza shaakka eranaas qoppadis gido attiin ta erappe bolla gidides.

¹⁷ Hessika tani Xoossa Geeshshasoho gelana gakkanaassinne iitata wurseththa be7ana gakkanaassa.

¹⁸ Addaka ne istta hallixizaason woththadasa; neni istta duge bashshaso yeddadasa.

¹⁹ Istti hassa7ontta eeson dhayda; dagaman issoyka attontta dippi gida.

²⁰ Abeet Godawu! Neni dendiza wode asi dhiskofe beeggiin dhayza agumo mala istti dhayana.

²¹ Tani yiillotida wodenne ta wozinaykka madunxida wode,

²² tani qofay baynda dammadis; tani ne sinththan miiza mala gidadis.

²³ Gido attiin tani ubbatokka nenara days; ta ushachcha kushezakka neni oykkadasa.

²⁴ Ne zoren tana kaaleththadasa; hessafe guye neni tana bonchchos efana.

²⁵ Salon neeppe attiin taas haray ooni dizee? Sa7ankka neeppe hara oonakka koykke.

²⁶ Ta wolqqaynne ta wozinay daaburanaas dandayees; gido attiin Xoossi ta wozinas minoteththinne taas mernaa qaada.

²⁷ Neeppe haakkizayti dhayana; nees ammanettonttayta ubbaa neni dhayssana.

²⁸ Gido attiin taas Xoossako shiiqoy lo7o; ne ooso ubbaa yootana mala. Tani Ubbaa Haariza GODAA ta baqata attizaso ooththadis.