ዬ ማጻፋ 72 - Geeshsha Maxaafa

Solomoone Mazamure

¹ Abeet Xoossawu! Suure pirda kawos, ne xilloteththaka kawo naas imma.

² Histtiko izi ne deraas xilloteththan pirdana; naaqettidaytasikka suure pirdana.

³ Zumati dureteth ehana; zumbullatikka xilloteth ne deraas ehana.

⁴ Metotidayta gishshas izi mootettana; hiyeesata izi ashshana; un7eththizayssaka izi liiqisana.

⁵ Awaynne aginay diza wode ubbaan yeletappe yeleta gakkanawu asay izas haaretto.

⁶ Kawoy shooqan bukkiza ira malanne gade kalssiza puuse ira mala gidana.

⁷ Izi diza layth ubbaan xilloy ciiyana; aginay dhayana gakkanaas biitta bolla saroteththi darana.

⁸ Abbafe biidi abba gakkanaas, Efiraaxise Shaafaappe sa7a gaxa gakkanaas izi haarana.

⁹ Bazzon mehe xalla haari aqizayti, iza morkketi gudulla laaccana.

¹⁰ Tarseese kawotinne harurota kawoti izas giira ehana. Saabanne Saaba kawoti izas kushe genththo ehana.

¹¹ Kawoti ubbay izas gulbatana; kawoteththay ubbay izas haarettana.

¹² Metotanchchay waassiza wode, manqonne maadoy baynda as izi ashshana.

¹³ Hiyeesatassinne manqotas izi qadhettees; metotanchchata shemppoka izi hayqoppe ashshees.

¹⁴ Istta shemppo qohoppenne geneppe izi ashshana; istta suuththay iza sinththan al7o.

¹⁵ Kawoy shemppo gam7o; Saaba biitta worqqay izas imetto. Pacey baynda izas woossetto; gallas ubbaan istti iza anjjetto.

¹⁶ Biittan daro kaththay mokko; zumati kaththan kamettetto; Biittay Libaanoose mala kaththa biitta gido; maatay demba kumiza mala katama kumo.

¹⁷ Kawoza sunththi mernaas minni de7o; arshey de7iza keena xeygettishe gam7o. Kawoteth ubbay iza baggara anjjetto; dere ubbay iza, «Ne anjjettidaade» gi anjjo.

¹⁸ Malalisiza miish barkka ooththiza GODAY, Xoossay, Isra7eele Xoossay galatetto.

¹⁹ Iza bonchcho sunththay mernaas galatetto; biitta ubbay iza bonchchon kumo. Amiin! Amiin!

²⁰ Isseye naa Dawite woosay hayssan polettides.