ዬ ማጻፋ 71 - Geeshsha Maxaafa

¹ Abeet GODAWU! Neni taas ta baqata attizaso; mulekka ne tana yeellasoppa.

² Ne xilloteththan tana kessa ekka; ne hayththa taakko yeggada tana ashsha.

³ Ne taas ubba wode geemetta attiza mino zaalla gida; tana ashshanaas ne azaza; taas mino miixaynne zaallay nena.

⁴ Abeet ta Xoossawu! Iitata kusheppe, genanchchatappenne menxe iitatappe tana ashsha.

⁵ Abeet Ubbaa Haariza GODAWU! Ta hidotay nena; yelagateththa wodeppe doommada ta ammanettizay nena.

⁶ Tani yelettoosofe doommada ta nenan zemppadis; ta aayey uloppe ta yelettana mala ooththiday nena; ubba wode ta nena galatays.

⁷ Daro asay tana dumma ayfen xeellides; neni gidikko ta baqata attiza wogga zaalla.

⁸ Gallas kumeth ne bonchcho ta yootanaas, ta doonan galatay kumides.

⁹ Tani cimmida woden tana oloppa; ta wolqqay ixxida woden tana aggofa.

¹⁰ Ays giikko ta morkketi tana hilida; tana wodhanawu koyzayti ta bolla iita maqettida.

¹¹ Istti, «Xoossi iza aggides; iza ashshanaykka deenna; hessa gishshas ane iza gooddi oykkoos» gida.

¹² Abeet Xoossawu! Taappe haakkofa. Abeet ta Xoossawu! Tana maaddanaas elela.

¹³ Tana mootizayti yeellatidi dhayetto. Tana qohanawu koyzayti yeellanne kawushshateth may7etto.

¹⁴ Tani gidikko ubbato nena hidota ooththays. Tani galata bolla galata nees gujjana.

¹⁵ Tani ay likke haasayanaakko erontta aggikokka gallas kumeth ta doonay ne xilloteththa gishshassinne ne atoteththa gishshas haasayees;

¹⁶ Abeet Godawu, Xoossawu! Tani yaada ne wolqqama ooso awajjana; qasseka ne xilloteththaa xalla yootana.

¹⁷ Abeet Xoossawu! Neni tana yelagateththafe doommada tamaarsadasa; tanikka hanno gakkanawu malalisiza ne oosoza awajjays.

¹⁸ Abeet Xoossawu! Ne maataa guyeppe yaana yeletas, ne wolqqa guyeppe yaana dere ubbaas, ta qonccisana gakkanaassinne ta cimada puulumana gakkanaas ne tana aggofa.

¹⁹ Abeet Xoossawu! Ne xilloteththay salo gakkides; Abeet Xoossawu! Neni gita miish ooththadasa; nena misatizay oonikka deenna.

²⁰ Neni ta bolla daro meto ehadasa; gidikkoka neni tana ciimma ollafe goochcha kessadasa; ta de7o zaara ooraththadasa.

²¹ Neni ta bonchcho kaseyssafe darsana; neni tana zaareththadakka minththeththana.

²² Abeet ta Xoossawu! Ne tumateththa gishshas tani nena diiththan galatana; abeet Isra7eele Geeshshawu! Tani maasinqon nena sabbana.

²³ Ta wozinay ufayssan kumidi nees yexxiza wode, neni wozzida ta shemppoya nees ililawus.

²⁴ Ta inxarsay ne xilloteththa gishshas gallas kumeth haasayees; ta qoheteth koyzayti yeellatidanne kawuyida.