ዬ ማጻፋ 7 - Geeshsha Maxaafa

Biniyaame Zare Kuuze Gaason Dawiti Godaakko Zilalida Zilas

¹ Abeet GODAWU! Ta Xoossawu neni taas qotettizaso; tana gooddiza ubbaafe neni tana ashsha.

² Neni tana ashshontta aggiko, istti tana gaammo mala menththereththidi, ooninne ashshonttason puuzereththana.

^3-4 Abeet GODAWU ta Xoossawu! Tani as qohidaa gidikko, taas lo7o ooththidaades iita zaaridaa gidikko, woykko gaasoykka baynda ta morkkefe bonqqidaa gidikko, heyta mala yo7otappe issinokka tani ooththidaa gidikko,

⁵ ta morkkey tana gooddi oykko; tana sa7ankka yedhereththo; tana biittan yeggidi ta bonchcho kawushsho.

⁶ Abeet GODAWU! Ne hanqon denda eqqa; eexxiza ta morkketa hanqo bolla denda; ta Xoossawu beegga; tumu pirda pirda.

⁷ Dereta duulatay ne yuushozan shiiqo; neni istta bolla kawota.

⁸ GODAY kawoteththata bolla pirdees. Abeet GODAWU! Taas ta xilloteththa malanne ta suureteththa mala pirda.

⁹ Qofanne wozina pilgga eriza xillo Xoossawu! Iitata geneza neni dhayssa; gido attiin xillota saron naaga.

¹⁰ Xoossi taas gondalle; wozina xillota izi ashshiza Xoossa.

¹¹ Xoossay xillo pirdiza Xoossa; izi gallas gallas ba hanqo qonccisiza Xoossa.

¹² Asi ba nagara paaxidi simmontta aggiko, Xoossi ba mashsha leefees; izi ba wondafeza dafi oykkees.

¹³ Izi wodhiza ola miishshata giigssees; tama laco mala popol7u giza ba toora yiishshaa giigssees.

¹⁴ Iitateth shaaridi, gene qanththatiday wordo yelees.

¹⁵ Hara asatas olla bookkida asi ba bookkida ollan simmi kundees.

¹⁶ Izi ehiza geney iza hu7es simmees; iza makkallaykka simmidi izas gidees.

¹⁷ GODAA xilloteththa gishshas tani iza galatana; qasse Ubbaafe Dhoqqa GODAA sunththas tani galata mazamure yexxana.