ዬ ማጻፋ 69 - Geeshsha Maxaafa

Dawiti Zammareta Kaabbos Ciishshata Giigiso Geetettiza Waaxan Yexxida Mazamure

¹ Abeet Xoossawu! Haaththa kixay taas qoodhe gakkida gishshas ne tana ashsha.

² Tohoy eqqizasoy baynda caren mitettadis; ciimma haaththa giddo geladis; haaththa dambalay tana mittana hanees.

³ Tani maado demmanaas waassashe daaburadis; taas qoodhe poorandeyka melides. Ta Xoossa naagon dishin ta ayfey baljumides.

⁴ Tana mela coo ixxizayti ta hu7e binanappe daro. Wordora tana morkkizaytinne tana dhayssanawu koyzayti darida. Ta kaysa ekkontta miish tana qanxxa gida.

⁵ Abeet Xoossawu! Ta eeyateththa neni eraasa; ta ooththida nagaray neeppe qotettibeenna.

⁶ Abeet Godawu, Ubbaafe Wolqqama GODAWU! Nena hidota ooththidayti yeellatopetto; Abeet Isra7eele Xoossawu! Nena minththi koyzayti ta gaason kawuyofetto.

⁷ Tani cash ne gishshas gaada dandayadis; ta ayfesoy yeellatides.

⁸ Tani ta ishanttas imath, qasse ta aayey naytas allaga gidadis.

⁹ Tani ne keeththas mishettiza mishoy tana tama mala xuuggees; Asay nena cayida cashshay tana gakkides.

¹⁰ Ta xoomashe yeekkadis; hessankka ta qidhettadis.

¹¹ Tani kayo may7o may7adis; isttaskka tani tosses attadis.

¹² Tani katama geliza pengen uttizaytas zigirsas attadis; maththottizaytas yeththas gidadis.

¹³ Abeet GODAWU! Tani gidikko nena woossays. Abeet Xoossawu! Ne doorida wode ta woosa siya; ne mernaa siiqon ne ashshiza ashoza tana bessa.

¹⁴ Caren mitettontta mala tana ashsha. Tana ixxizaytappe tana naaga; ciimma haaththafekka tana ashsha.

¹⁵ Di7o haaththi tana efoppo; ciimma abbay tana mittofo; ciimma ollay ta bolla woddofo.

¹⁶ Abeet GODAWU! Ne mernaa siiqo kiyateththa mala taas zaaro imma; Ne qadheta daron taakko simma.

¹⁷ Taappe ne ayllezappe ne sinththa genththofa; tani waayettiza gishshas taas eeson zaaro imma.

¹⁸ Neni taakko shiiqada tana wozza; ta morkketappekka tana kessa la7a yedda.

¹⁹ Ta bolla gakkida cashsha, yeellateththaanne kawushshateththaa ne eraasa; ta morkketakka hu7en hu7en ne demmaasa.

²⁰ Cashshi ta wozina madunththiin ta hidota qanxxadis. Taas qadhettiza as koyadis; gido attiin issi asikka deenna. Tana minththeththiza as koyadis; gido attiin issaadeka demmabeekke.

²¹ Tani gafida wode taas cammiza kath immida. Tani saamettida wode taas caala phanqida ushshu immida.

²² Istti miza maadday isttas woximade gido. Istti yarsho yarshidi miza maadday isttas gite gido.

²³ Xeellontta mala istta ayfey goozetto; istta zokkoy quunni atto.

²⁴ Neni ne hanqoza istta bolla gussa; istti qoppontta dishin ne boshay istta bolla gakko.

²⁵ Istta duussasoy kays gido; istta dunkaanen oonikka dooppo.

²⁶ Ays giikko neni qaxxaydayta istti yedeththeettes; qasse neni madunththida asata bolla meto darseettes.

²⁷ Istti nagara bolla nagara gujji gujji baana mala aggaaga; ne istta maaroppa.

²⁸ Istti de7o maxaafappe qucettetto; xillotara issife mazgabettofetto.

²⁹ Gido attiin tani sakettashenne waayettashe de7ays. Abeet Xoossawu! Ne tana ashshadanne naaga.

³⁰ Tani Xoossa sunththa yeththan galatana; galata yeththan iza gitateththaa qonccisana.

³¹ Hayssi sangettontta boorappenne korma yarshofe aadhdhidi GODAA ufayssana.

³² Qohettidayti tana Xoossay ashshidayssa be7idi ufayetetto. Intteno Xoossako shiiqizayto intte wozinay minetto.

³³ Ays giikko GODAY hiyeesata siyees; qasho keeththan de7iza ba asaakka kadhenna.

³⁴ Saloynne sa7ay, abbaynne iza giddon woxxi qaaxxiza ubbati Xoossaa galatetto.

³⁵ Gaasoykka Xoossi Xiyoone ashshana; Yuhuda katamata zaaridi essana. Iza derey he biitta laattidi heen de7ana.

³⁶ Iza oosanchchata zarey he biitta laattana; iza sunththa siiqizayti heen de7ana.