ዬ ማጻፋ 68 - Geeshsha Maxaafa

Dawiti Zammareta Kaabbos Yexxida Mazamure

¹ Xoossi dendo; iza morkketi laalettetto; iza ixxizayti iza sinththafe baqatetto.

² Cuway carkon laalettiza mala neni istta laalla; muqaadday taman seeriza mala, iitati Xoossa sinththafe seeri dhayetto.

³ Xilloti gidikko ufayetetto; Xoossa sinththan ufayssan hombocetto; qasseka maguletto.

⁴ Xoossas yexxite; iza sunththas galata mazamure yexxite. Shaara bollara hemettizayssa dhoqqu dhoqqu histtite; izas sunththay GODAA; intteka iza sinththan keehi ufayettite.

⁵ Xoossi ba geeshshasohon dishe aaway bayndaytas aawa; qasse am7etaska pirdiza daanna.

⁶ Xoossi barkka diza bizzatas soo as immees; qasho keeththan dizayta birshidi istta ishalon woththees. Makkallanchchati gidikko suulliza bazzon de7ana.

⁷ Abeet Xoossawu! Neni ne asa kaaleththida wode, neni isttara bazzo kanththida wode,

⁸ Siina Xoossa sinththan, Isra7eele Xoossa sinththan biittay qaaxxides; saloti ira duge tigida.

⁹ Abeet Xoossawu! Neni koshshiza keena ira immadasa; ladda biittaaka araddisadasa.

¹⁰ Ne derezikka izo baas duussaso histtida; abeet Xoossawu! Manqotas koshshizaaz neni kiyateththan immadasa.

¹¹ Goday qaala yeddides; he kiitaa daro maccassati deraas awajjida.

¹² Istti, «Kawoti ba olanchchatara di7o gishetti ekkida.

¹³ Dorsata naaganaas guyen attidayti birappe oosettida qefeti bollara xolqiza worqqan tiyettida haraphphe misle demmida» gida.

¹⁴ Ubbaa Dandayza Xoossay kawota laallida wode, Xalmoone Zuma bolla shach bukisides.

¹⁵ Baasaane zumati wogga gita zumata; Baasaane zumata bolla daro poggonoti deettes.

¹⁶ Daro poggonoti de7iza zumatoo! Xoossi daanaas doorida zumaza intte ays miqqaynen xeelleetii? GODAY izan mernaas de7ana.

¹⁷ Xoossa para-gaareti daro shiyan qoodettizayta; Goday Siina zumaappe ba geeshshasoho yides.

¹⁸ GODAWU! Di7o ekkada pude ne duussas kezadasa; asa ubbaafe imota ekkadasa; haray attoshin makkallanchchatappeka ekkadasa;

¹⁹ Hach hach nu tooho tookkiza Goday, nuna ashshiza nu Xoossay galatetto.

²⁰ Be7ite! Nu Xoossi ashshiza Xoossa! Hayqoppe attana dandayettizay GODAY ashshiina.

²¹ Xoossi tumappe ba morkketa hu7e kinchchana; nagara ogen hemettiza goofaranchchata hu7e qoo7ereththana.

²² Goday, «Tani intte morkketa Baasaaneppe zaarada ehana; tani istta ciimma abba giddofe kessada guye zaarana.

²³ Neni ne morkketa suuth yedhdha aadhdhana; ne kanatikka morkketa suuththafe bantta gisha laaccana» gides.

²⁴ Abeet Xoossawu! Ne xoono cifray ubbaan beettees; ta Xoossanne ta kawoy azhaban ba geeshsha soo gelththishe qonccees.

²⁵ Yexxizayti sinththan, qasse karabe baqqiza geela7oti giddon, diixxizayti guyen azhabi beetteettes.

²⁶ Istti, «Xoossaa kumeththa shiiqon galatite; intteno Isra7eele zereththato GODAA galatite» geettes.

²⁷ He cifran ubbaafe kaalotiza Biniyaame zareti kaaleththeettes. Kaallidi Yuhuda daannati bantta butten butten beettes; wurseththan Zaabiloone daannatinne Niftaaleme daannati kaalleettes.

²⁸ Abeet Xoossawu! Ne wolqqa qonccisa. Hayssafe kase ne nuus ooththidayssaththo ha7ikka ne minoteth nuna bessa.

²⁹ Yerusalaamen diza ne Keeththa gishshas kawoti imota nees ekki yaana.

³⁰ Maqqa giddon diza do7ata neni seera. Booratanne marata wude misatiza kawota neni laalla; istti gulbatidi bantta bira nees giirana mala ooththa; olettanaas yeemottiza asata laalla.

³¹ Gita asati Gibxeppe yaana; Tophphiyay ba kushe Xoossako miccana.

³² Intteno sa7a kawoteththatoo! Xoossas yexxite; Godaas galata mazamure shiishshite.

³³ Beniisoppe doommidi diza salotappe bollara bizayssas yexxite; izi ba wolqqama cenggurssa guunththan yootishin ezgi siyite.

³⁴ Iza teemay Isra7eele bollana; iza wolqqayka salonna. Hessa gishshas Xoossa wolqqa awajjite.

³⁵ Abeet Xoossawu! Neni ne keeththafe qonccashe malalisaasa; Isra7eele Xoossay ba deraas minoteththinne wolqqa immees. Xoossi galatetto.