ዬ ማጻፋ 66 - Geeshsha Maxaafa

Zammareta Kaabbos Yexettida Mazamure

¹ Sa7an diza as ubbay intte qaala dhoqqisidi ililisan Xoossa galatite.

² «Xoossa sunththi bonchchetto!» giidi yexxite; bonchcho galata izas immite.

³ Xoossas, «Ne oosoti ay keena malalisizoo! Ne wolqqay daro gidida gishshas ne morkketi yashshan ne sinththan kokkoreettes.

⁴ Sa7an diza ubbay nees goynnees; nena sabbees; ne sunththas galata mazamure yexxees» giite.

⁵ Haa yiite; Xoossi ooththidaaz be7ite; izi asa giddon malalisiza ooso ooththides.

⁶ Izi abba haaththa shaakkides; qasse beni nu aawati shaafara mela biittara tohon pinnida; nunikka izi ooththida ooson ufayettidos.

⁷ Izi ba wolqqan mernaas haarees. Kawoteththata ubbaaka ba ayfen xeellees; hessa gishshas makkallizayti iza bolla dhoqqu dhoqqu gooppetto.

⁸ Asawu! Nu Xoossa galatite; intte galata cenggurssay siyetto.

⁹ Izi nuna shemppora paxa woththides; nuni kundontta malakka naagides.

¹⁰ Abeet Xoossawu! Neni nuna paacca xeelladasa; bira seerisi geeshshiza mala nuna geeshshadasa.

¹¹ Neni nuna woximaden gelththadasa; Nu zokkonkka deexo ba7o ba7isadasa.

¹² Nu morkketi nuna hu7era duge yedhdhana mala ooththadasa; nuni haaththa giddoranne tama giddora kanththidos; gido attiin ha7i nuna ishalo soho ehadasa.

¹³ Tani xuugettiza yarshora ne geeshshasoho gelada ta adina nees gaththana.

¹⁴ Tani metotida wode ta doonappe ta kessidayssa ta inxarsan ta adinettida adina ta gaththana.

¹⁵ Tani nees xuugettiza yarshos modhdhota shiishshana; sawo yarshos dharshota, kormatanne korbeta shiishshana.

¹⁶ Intteno Xoossas yayyizaytoo! Ubbati haa yiidi siyite; Xoossi taas ooththidayssa tani inttes yootana.

¹⁷ Ta qaala dhoqqu histtada tani izakko waassadis; ta inxarsankka izas galata shiishshadis.

¹⁸ Tani ta wozinan nagara genththidaakko, Goday ta woosa siyenna.

¹⁹ Gido attiin Xoossi tumappe taas siyides; ta woosaakka ezgides.

²⁰ Ta woosa kadhontta, ba mernaa siiqo taappe haassontta Xoossay galatetto.