ዬ ማጻፋ 65 - Geeshsha Maxaafa

Dawiti Zammareta Kaabbos Yexxida Mazamure

¹ Abeet Xoossawu! Xiyoonen nees galatay bessees; nuni nees adinettidayssa gaththana.

² Abeet woosa siyizayssoo! Asay ubbay neekko yaana.

³ Nu nagaray nuna mittides; neni gidikko nu balaa atto ga wursadasa.

⁴ Neni dooridaadeynne nenara daana mala ne dubbushaakko shiishsha ekkidaadey anjjettidaade; ne geeshshasozappenne ne dunkaane anjjozappe nu kallana.

⁵ Abeet nuna ashshiza Xoossawu ne xillo ooson malalisiza miish nuus ooththa; Sa7aa gaxappe gaxa gakkanaas, haaho abbatappeka he pinththan diza asa ubbaas hidotay nena.

⁶ Neni ne wolqqa gixettadasa; zumatakka ne minththa essadasa.

⁷ Neni abba giirissanne dambala gunththa sirphi ooththaasa; qasse derey dendiza denththa irxxisaasa.

⁸ Hessaththo neni ooththida malaata gishshas, sa7a gaxa gakkanaas de7iza asay ubbay nees, «Hoola!» gees. Arshey mokkizasoppe wullizaso gakkanaas diza asa ubbaa ufayssan ilili giissadasa.

⁹ Neni biitta naagada haath ushshaasa; histtada daro duresaasa; Asas kaththay mokkana mala Xoossa shaafay haaththan kumides; hessaththo ooththada neni giigsadasa.

¹⁰ Goshsha gadetas gidiza ira immaasa; Phasheta liiqisaasa; biittaaka puuse iran shugisaasa; caarechchati doli diccana mala anjjaasa.

¹¹ Layththaa kalo layth ooththaasa; neni aadhdhidaso ubbay kath xalla gidees.

¹² Mehe heemmizasohon cilila maatay kumides; zumbullati ufayssan kumida.

¹³ Dembatan wude mehey kumides; shoobbatan kaththi kumides; ubbatikka ufayssan ililishe yexxeettes.