ዬ ማጻፋ 64 - Geeshsha Maxaafa

Dawiti Zammareta Kaabbos Yexxida Mazamure

¹ Abeet Xoossawu! Ta magana neni siya; ta shemppoyo wodhanaas mandiza ta morkketappe tana ashsha.

² Pala asata maqqofenne makkallanchchata duulatappe tana genththa.

³ Istti bantta inxarsaa mashsha mala leefida; qasse marze qaalata wondafe yiishsha mala dukkanaas giigsida.

⁴ Istti qotettidi bantta wondafen xillo as dukkeettes; asi akeekontta dishin dukkanaas guye geettenna.

⁵ Istti iita ooththanaas issoy issaara maqetteettes; geemara woximade woththanaas zoretteettes; istti, «Nuna ooni be7anee?» geettes.

⁶ Istti gene maqettishe, «Nuni lo7o maqqo maqettidos» geettes; hessika asa wozinaynne kahay iitan kumidayssa bessees.

⁷ Gido attiin Xoossay istta ba yiishshan dukkana; istti akeekontta madunththana.

⁸ Izi istti haasayda qaala istta bolla zaarana; isttaka bashshan gaththana; istta be7ida ubbay aamusidi hu7e qaaththana.

⁹ He wode asay ubbay Xoossas yayyana; Xoossa ooso qonccen yootana; izi ooththidayssaka yuushshi qoppana.

¹⁰ Xilloti GODAAN ufayetetto; izakka baas baqati attizaso ooththetto; wozina suureti ubbay iza galatetto.