ዬ ማጻፋ 63 - Geeshsha Maxaafa

Yuhuda Bazzon Diza Wode Dawite Mazamure

¹ Abeet Xoossawu! Neni ta Xoossa; ta nena wozinappe koyays; ta ashoykka nena amottees. Haaththi baynda mela biittay haath koyza mala ta asateththay nena saamettees.

² Tani nena geeshshasohon xeelladis; ne wolqqanne ne bonchcho tani be7adis.

³ Ne mernaa siiqoy de7oppe lo7ees; ta inxarsay nena galatees.

⁴ Ta de7o layththankka tani nena galatana; ne sunththan ta kushe pude neekko denththana.

⁵ Asi lo7o kath mi kallidi ufayettiza mala ta shemppoya nenan ufayettana; tani ta inxarsan ufayssa yeththan nena galatana.

⁶ Tani ta hiixan dashe nena hassa7ays; omarsa kumeth ne ooso yuushsha qoppays;

⁷ Neni tana maaddiza gishshas tani ne qefe kuwan uttada ufayssan yexxays.

⁸ Ta shemppoya shiphphi ga kaalladus; ne ushachcha kusheykka tana minththi oykkides.

⁹ Gido attiin tana wodhana koyzayti biitta garsan ciimma ollan moogettana.

¹⁰ Istti mashshas aadhdhi imettana; istti godare kawo gidana.

¹¹ Gido attiin kawoy Xoossan ufayettana; Xoossa sunththan caaqqiza ubbay iza galatana; wordo haasayzayta doonay gidikko gordettana.